لەهەولێر 15 هەزار سەگی بەرەڵا لە دەرەوەن و 16 هەزاریش لە شێڵتەردان
SNN-عەلی حەمە سەعید
بەرێوەبەری خزمەتگوزاری و ژینگەپارێزی لە هەولێر ئاماژە بەوەدەكات بەگوێرەی بەدواداچوونەكانمان نزیكەی 31 هەزار سەگی بەرەڵا لە سنوری هەولێر بوونیان هەیە، لەو ژمارەیەش تا ئێستا توانیومان 16 هەزاریان لە شێڵتەردا كۆبكەینەوە و هێشتاش 15 هەزاریان لەدەرەوەن.
ژیار جەلال، بەرێوەبەری خزمەتگوزاری و ژینگەپارێزی هەولێر بەSNNی ڕاگەیاند: بەگوێرەی ئەو بەدواداچوونانەی تیمە مەیدانییەكانمان كردوویانە، پێشبینی دەكەین نزیكەی 31 هەزار سەگی بێلانە لە سنوری سەنتەری پارێزگای هەولێر هەبن، هاوكات تا ئێستاش توانیومانە 16 هەزار سەگی بێلانە بگوازینەوە بۆ شەڵتەر و لەوێ چاودێری بكرێن.
ئاماژەی بەوەشكرد، تا ئێستاش نزیكەی 15 هەزار سەگی بێ لانە لە گەڕەك و كوچە و كۆڵانەكانی هەولێر هەن، هەڵمەتەكانی كۆكردنەوەیان بەردەوامی هەیە، لەو چوارچێوەیەشدا بۆ لەمەودوا هەركەس بیەوێت سەگ بگرێت و بیگەیەنێتە شەڵتەر بۆ بەخێوكردن، گرێبەستی بۆ دەكەن و دواتر بۆ گرتنی هەر سەگێك سێ هەزار دیناری پێ دەدەن.
بەرێوەبەری خزمەتگوزاری و ژینگەپارێزی هەولێر ئەوەشی خستەڕوو، هەركەس ماتۆڕسكیلی سێ تایەی هەیە یان ئۆتۆمبێلی تایبەتی هەیە و خوازیارە لە هەڵمەتی گرتنی سەگدا بەشدار بێت، دەبێت سەردانمان بكات بۆ ئەوەی گرێبەستی بۆ بكەین و دواتر لەگەڵ هێنانی هەر سەگێكدا سێ هەزار دیناری پێدەدرێت.
