هۆشداری دەدرێت لە لەناوچوونی یەكجاری كێڵگە پەلەوەرییەكانی هەرێم

عەلی حەمەسەعید-SNN

سەرۆكی كۆمەڵەی كێڵگە پەلەوەریەكانی هەرێم ئاماژە بەوەدەكات، ئەگەر ئەو دۆخەی ئێستای كێڵگە پەلەوەرییەكان بەردەوامی هەبێت و حكومەت بەردەوام پشتگوێیان بخات، ئەوا تا دوو ساڵی دیكە كەرتی پەلەوەر بەتەواوی لەناو دەچێت.

نازم عەبدوڵا، سەرۆكی كۆمەڵەی كێڵگە پەلەوەریەكانی هەرێم بەSNNی ڕایگەیاند: بەهۆی رێگریكردن لەلایەن بازگەكانی حكومەتی عێراق كە ناهێڵن مریشك برواتە خوارووی عێراق، زیانێكی زۆری بە كێڵگە پەلەوەرییەكان گەیاندووە، هاوكات زۆرجار ئەو جووجك و هێلەی تروكاندنانەی هاوردە دەكرێن كوالیتیان زۆر خراپە و بووەتە هۆی زیانگەیاندن بە خاوەن كێڵگەكان.

ئاماژەی بەوەشكرد، ئەگەر ئەم پشتگوێخستنەی حكومەتی هەرێم بەردەوامی هەبێت، ئەوا كەرتی بەرهەم هێنانی پەلەوەر تەمەنی ناگاتە دوو ساڵی دیكە و لەناو دەچێت، ئەمەش دەبێت هۆی لە ناوچونی كەرتێكی گرنگی ئاسایشی خۆراك و دروستبونی بێكاری زیاتر.

سەرۆكی كۆمەڵەی كێڵگە پەلەوەریەكانی هەرێم ئەوەشی باسكردووە، ماوەیەکی زۆرە سەرجەم كیڵگە پەلەوەرییەكان لە زیاندان، بەجۆرێك زیاد لە 10 ملیار دینار زیانیان پێگەیشتووە، هۆكاری زیانەكەش نەبونی پلانی حكومەتی هەرێم و پشتیوانی نەكردنی لایەنە پەیوەندیدارەكانە لە چاودێری نەكردنی ئەو پێداویستیانەی بەكاری دەهێنین.