ئەندامێکی لیژنەی دارایی عێراق زانیاری نوێ لەسەر مووچە و بودجە ئاشکرا دەکات

SNN

ئەندامێکی لیژنەی دارایی لە ئەنجومەنی  نوێنەرانی عێراق رایدەگەیەنێت، کورتهێنانی بودجە گەیشتووەتە 63 ترلیۆن دینار، حکومەتیش دەتوانێت قەیرانەکان تێدەپەڕێنێت و گرفت بۆ مووچە دروست نابێت.

ئەمڕۆ دووشەممە 19ی ئایار، رۆژنامەی سەباحی نیمچە فەرمی حکومەتی عێراق لێدوانی حسێن موئەنەس ئەندامی لیژنەی دارایی عێراق بڵاوکردووەتەوە و ئاشکرایدەکات، حکومەت چەند بژاردەیەکی لەبەردەمدایە و دەتوانێت قەیرانەکان تێبپەڕێنێت و پرسی مووچەش  تووشی هیچ گرفتێک نابێت”.

ئاماژە بەوەدەکات، دواکەوتنی حکومەت لە پێشکەشکردنی خشتەکان  ئاماژەیەکی نەرێنییە و نیشانەی  سستییە لەوەڵامدانەوەی گۆڕانکاریی  ئابوریی  جیهانیی، بەتایبەتی دابەزینی نرخی نەوت و مانەوەی نرخی بەرمیلێک بە 70 دۆلار لە چوارچێوەی بودجەدا کارێکی راستەقینە نییە و دەبێت رای پسپۆڕان بۆ دەستکاریکردنی وەربگیرێت.

ئەوەشیخستووەتە ڕوو، کورتهێنانی بودجە گەیشتووەتە 63 ترلیۆن دینار، ئەوەش ژمارەیەکی گەورەیە و ئەرکی پەرلەمانە چارەسەرێک بۆ کەمکردنەوەی ئاستی کورتهێنان بدۆزێتەوە.

ئەو ئەندامەی پەرلەمانی عێراق دەڵێت “خشتەی بودجە ئاڵنگارییەکی  قورس و راستەقینەی نوێنەران دەبێت، چونکە دۆخی ئابووری عیراق  پشت بە یەک سەرچاوە دەبەستێت کە نەوتە و وڵات  تووشی ناجێگیری بازاڕی جیهانیی دەکات”.