“هیچ بەرپرسێكی پلەباڵا خانەنشین ناكرێت تا سەروەت و سامانەكەی ئاشكرا نەكات”

SNN-عەلی حەمەسەعید
سەرۆكی دەستەی دەستپاكی ئاماژە بەوەدەكات هیچ بەرپرسێكی پلە باڵا كە لەداموودەزگاحكومییەكان كاری كردووە خانەنشین ناكرێت، تائەوكاتەی سەروەت و سامانەكەی ئاشكرانەكات

د.ئەحمەد ئەنوەر، سەرۆكی دەستەی دەستپاكی هەرێم بە SNNی ڕاگەیاند: لەم كابینەیەی حكومەتی هەرێم هیچ پلە باڵایەك نەبووە كە فۆڕمی ئاشكراكردنی سەروەت و سامان پڕنەكاتەوە، بەڵام بەشێكیان فۆڕمەكەیان بە نادروستی پڕیان كردووەتەوە، هاوكات دوای خانەنشینبوونیان، جارێكی دیكە فۆڕمی ئاشكراكردنی موڵك و ماڵیان پێ پڕدەكرێتەوە، دواتر بەراوردكاری لەنێوان زانیارییەكانی هەردوو فۆڕمەكە دەكرێت، ئەگەر سەروەت و سامانەكەیان بەراورد بەمووچە و داهاتەكەیان زۆر زیادی كردبێت، لێپێچینەوەیان لەگەڵ دەكرێت.

ئاماژەی بەوەشكرد، هیچ بەرپرسێكی پلە باڵا كە لەداموودەزگاحكومییەكان كاری كردووە خانەنشین ناكرێت، تائەوكاتەی سەروەت و سامانەكەی ئاشكرانەكات، بەجۆرێك بەدواداچوون بۆ ئۆتۆمبێل و موڵك و ماڵ و تۆماری كۆمپانیا و خانوو و زەوی و موڵكەكانیان دەكرێت، هاوكات تا ئێستا نزیكەی 15 پلەباڵا زانیارییەكانیان بەدروستی پڕنەكردوەتەوە، بۆیە داوایانلێكراوە فۆڕمەكان بەدروستی پڕبكەنەوە.

سەرۆكی دەستەی دەستپاكی هەرێم ئەوەشی خستەڕوو، لە سەروەت و سامانی پلەباڵاكان بەراوردكاری لەنێوان ئەو دوو فۆڕمە دەكرێت كە لە پێش دەستبەكاربوونی لە پلە باڵاكە پڕی كردووەتەوە لەگەڵ كاتی خانەنشینبوونی لەو پلەیەدا ئەگەر لەبەراوردكاریی دەردەكەوێت سەروەت و سامانی بەرپرسەكە بە نائاسایی زیادبووە، ئەوا لێپێچینەوەی لەگەڵ دەكرێت و كەسەكە تۆمەتی دەستكەوتی ناڕەوای دەخرێتەپاڵ.