بە تۆمەتی سیخوڕیکردن بۆ موساد ئێران هاووڵاتییەکی خۆی لەسێدارەدا

SNN

حکومەتی ئێران رایگەیاند کەسێکیان بە تۆمەتی سیخوڕیکردن بۆ موسادی ئیسرائیل لە سێدارەداوە.

دەزگای دادی ئێران لە راگەیەنراوێکدا ئاشکرایکرد، وڵاتەکەیان پیدرام مەدەنییان بە تۆمەتی سیخوڕیکردن بۆ ئیسرائیل و گواستنەوەی زانیاریی لە وڵاتەکەیانەوە بۆ موساد لەسێدارەداوە.

ئاماژە بەوەکراوە، ئەو کەسە لە ساڵی 2020ەوە دەستگیرکراوە کەلەلایەن موسادەوە لە ئەڵمانیا مەشق و راهێنانی پێکراوە و لە رێگەی سیستمی پەیوەندی پارێزراوەوە زانیاریی هەستیاری سەبارەت بە دامەزراوە ستراتیژییەکەیان بۆ ئیسرائیل گواستووەتەوە.

ئەوەشخراوەتە روو، ئەو کەسە پەیوەندیی بە چەندین کارمەندی موسادەوە لە وڵاتە جیاوازەکانەوە هەبووە، لەوانە کۆبوونەوەیەک لەناو باڵیۆزخانەی ئیسرائیل لە برۆکسل و لە ماوەی سیخوڕییەکەیدا گەشتێکی بۆ ناوچە داگیرکراوەکان کردووە.

هاوکات، دوای تەواوبوونی لێکۆڵینەوەکان و دڵنیابوونەوە لە کردەکانی ئەو کەسە لەلایەن دادگای باڵای ئێرانەوە سزایی لەسێدارەدانی پەسەندکراوە.

بەگوێرەی راگەیەنراوەکەی دادی ئێران، پیدرام مەدەنی تەمەن 40 ساڵ دوای زیاتر لە چوار ساڵ زیندانیی سێ جار سزای لەسێدارەدانی دواخراوە و دواجار رۆژی چوارشەممە لەسێدارە درا.