ئامانج رەحیم: نابێت داهاتی نەوتی و نانەوتی ببێتە هۆکاری خەرجنەکردنی مووچە

SNN-

سكرتێری ئەنجوومەنی وەزیرانی هەرێمی كوردستان، بەڵگەنامەیەكی دادگای فیدراڵی بڵاودەكاتەوە، لەبارەی خەرجكردنی مووچەی فەرمانبەرانی هەرێم لەلایەن بەغداوە.

ئامانج رەحیم، سكرتێری ئەنجوومەنی وەزیرانی هەرێمی كوردستان بەڵگەنامەکەی دادگای فیدڕاڵی بڵاوکردووەتەوە و دەڵێت:”ئەمەی خوارەوە وەرگێڕانی كوردی دەقی ئۆڕجناڵی بڕگەی (شەشەم)ە لە لاپەڕەی (15) لە بڕیاری دادگای باڵای فیدراڵی ژمارە (224 و موحدتها 269/ اتحادیە/ 2023) لە 21-2-2024 كە بڕیارێكی پابەندە بۆ هەموو دەسەڵاتەكان ونابێت هیچ یاسا و بڕیار ونووسراوێك پێچەوانەی ئەمە دەربچێت:

(شەشەم: ناكۆكی نێوان حكومەتی فیدراڵی و حكومەتی هەرێم دەربارەی جێبەجێكردنی ماددەكانی یاسای بودجەی گشتی فیدراڵی كۆماری عێراق ژمارە (13)ی ساڵی 2023، و بە تایبەتی هەردوو ماددەی (12 و 13)ی یاساكە، نابێت ببێتە هۆكاری سەرەكی خەرجنەكردنی مووچەی مانگانەی فەرمانبەران و خانەنشینان و سوودمەندانی تۆڕی پاراستنی كۆمەڵایەتی لە هەرێم لە كاتی دیاریكراوی خۆی.)

سكرتێری ئەنجوومەنی وەزیرانی هەرێمی كوردستان دەشڵێت:”هەردوو ماددەی 12 و13 ی یاسای بودجە پەیوەندیدارە بە داهاتی نانەوتی و پابەندیی نەوتی هەرێم، كە هەردوو حكومەت ناكۆكیان هەیە لەسەر چۆنیەتی جێبەجێكردنی هەردوو ماددەكە.