تاقیکردنەوەی خوێندکاران
SNN-
ئەمڕۆ یەکشەممە بە بەشداریی زیاتر لە 115 هەزار خوێندکار، تاقیکردنەوە گشتییەکانی پۆلی 12ی ئامادەیی بەسەرجەم بەشەکانییەوە لە سەرانسەری هەرێمی کوردستان دەستیانپێکرد.
بۆ تاقیکردنەوەکانی ئەمساڵ وەزارەتی پەروەردە دوو هەزار و 17 هۆڵی تاقیکردنەوەی لە سەرتاسەری هەرێمی کوردستان بۆ تاقیکردنەوەکان ئامادەکردووە، دوو تاقیکردنەوە پێش جەژن دەکرێت، هەر رۆژێکیش پشووی فەرمی بێت، پاش پشووەکە تاقیکردنەوەکان بە ریزبەندیی خۆیان بەردەوام دەبن.
بۆ دوورگرتنی خوێندکاران لە هەر جۆرە گزیکردنێک بەپێی بڕیاری وەزارەتی گواستنەوە و گەیاندن لە رۆژانی تاقیکردنەوەکاندا بۆ ماوەی چەند کاتژمێرێک هێڵەکانی ئینتەرنێت لە هەرێم رادەگیرێن، هەر خوێندکارێکیش گزی بکات تەواوی ساڵەکەی بە کەوتوو بۆ هەژماردەکرێت.
