كەشوهەوای ڕۆژانی جەژنی قوربان چۆن دەبێت؟ پلەكانی گەرما بەرز دەبنەوە؟

SNN-عەلی حەمە سەعید

شارەزایەكی بواری كەشناسی ئاماژە بەوەدەكات پلەكانی گەرما لە ڕۆژانی جەژنی قوربان تا ڕادەكی زۆر بە جێگیری دەمێننەوە و بەرزبوونەوەی ئەوتۆ بە خۆیانەوە نابینن كە لەنێوان 35 بۆ 38 پلەدا دەبێت، بەڵام لەدوای جەژن پلەكانی گەرما ڕوو لەبەرزبوونەوەی زیاتر دەكەن.

شاڵاو هیدایەت، شارەزای بواری كەشناسی بە SNN-ی ڕاگەیاند: كەشوهەوای ئەم چەند ڕۆژە تا ڕادەیەكی زۆر وەك خۆی بە جێگیری دەمێنێتەوە و گۆڕانكاری ئەوتۆیان بەسەردا نایەت، بە جۆرێك پلەكانی گەرما لە نێوان 35 بۆ 38 پلەدا دەبێت و ئەوەش پلەیەكی گەرمای ئاساییە لەم وەرزەدا.

ئاماژەی بەوەشكرد، لە ڕۆژانی جەژندا پلەكانی گەرما لە 40 پلە تێپەڕناکات، بەڵام لە سنوری ئیدارەی گەرمیان لە سێیەم ڕۆژ و چوارەم ڕۆژ پلەكانی گەرما دەگەنە ئاستی 40 پلە و لەوانەیە زیاتریش بەرزببێتەوە.

ئەو شارەزایەی بواری كەشناسی ئەوەشی خستەڕوو، لەدوای پشووی جەژنی قوربان، پلەكانی گەرما دەست دەكەن بە بەرزبوونەوەی زیاتر و ئاستی سەر و 40 پلە تێدەپەڕێنن، بەڵام لە ڕۆژانی جەژن پلەكانی گەرما بەرز بوونەوەی ئەتۆ بەخۆیانەوە نابینن.