جەمال کۆچەر: بەم نزیکانە خشتهی بودجەی 2025 دهگاته پهرلهمان
مووچە بودجە
SNN-
ئهندامێكی پەرلەمانی عێراق پێشبینی دەکات بەم نزیکانە خشتی بودجەی ساڵی 2025 بگاتە پەرلەمانی عێراق و دڵنیایی دهدات تێپەڕاندنی ئاسان دەبێت و ههركاتێك گهیشت دهتوانرێت بهبێ دواكهون پهسهندبكرێت.
جەمال کۆچەر، ئەندامی لیژنەی دارایی پهرلهمانی عێراق به ڕۆژنامهی سهباح-ی ڕایگهیاندووە، پێشبینی دەکات بەم نزیکانە خشتهی یاسای بودجەی گشتی ساڵی 2025 بگاتە پەرلەمان، دوای ئهوهی لهلایهن ئهنجومهنی وهزیرانی عێراقهوه تهواوكرا.
دەشڵێت:”پەرلەمان ئامادەیە هەر کە خشتهی بودجه بە فەرمی گەیشت دانیشتنێکی نائاسایی ئەنجامبدات، بە ئامانجی گفتوگۆکردن و پەسەندکردنی خێرای و لیژنەی دارایی پێشبینی ناکات له دانیشتنەکەدا گفتوگۆیەکی دورودرێژ یان قوڵ ههبێت لەسەر خشتەکانی بودجەی نوێ، بە لەبەرچاوگرتنی ئەوەی کە هیچ گۆڕانکارییەکی بنەڕەتی تیادا ناكرێت بە بەراورد بە بودجەی ساڵی ڕابردوو، کە لە ماوەی سێ ساڵدا بەبێ هەموارکردنەوەی بەرچاو پەسەندکرا”.
وتیشی:”ئەگەر هەندێک هەموارکردنەوەی بچوکیش لە ڕەشنوسی بودجەدا هەبێت، ڕەوتی باو ئەوەیە کە یاساکە دەربکرێت وەک ئەوەی لەلایەن حکومەتەوە خراوەتەڕوو، بەمەبەستی پاراستنی سەقامگیری پڕۆسەی دارایی و ئابوری و دوورکەوتنەوە لە هەر دواکەوتنێک کە کاریگەری نەرێنی لەسەر ئەدای حکومەت و پێداویستییەکانی هاووڵاتییان هەبێت”.
