ئێران دانوستانە ئەتۆمییەکانی لەگەڵ ئەمریکا هەڵوەشاندەوە

SNN

تەلەفیزیۆنی فەرمیی ئێران رایگەیاند، حکومەتی وڵاتەکەی بەشداری لە دانوستاندنە ئەتۆمییەکاندا ناکات کە بڕیاربوو رۆژی یەکشەممە 15ـی حوزەیران بەڕێوەبچن.

ئەم بڕیارە دوای هێرشە بەرفراوانەکەی بەرەبەیانیی ئەمڕۆی ئیسرائیل هات کە بووە هۆی کوژرانی ژمارەیەک لە فەرماندە باڵاکانی ئێران وەک حوسێن سەلامی، فەرماندەی گشتیی سوپای پاسداران و محەممەد باقری، سوپاسالاری ئێران.

ئێران بە فەرمی ئەمریکای بە هاوکاریکردن و “بەرپرسیار” لە هێرشەکە تۆمەتبار کرد و هەڕەشەی “تۆڵەسەندنەوەی سەخت” دەکات. لە بەرامبەردا، ئێران یەکەم وەڵامی سەربازیی خۆی بە ناردنی  زیاتر لە 100 درۆن بۆ ئیسرائیل دەستپێکرد.

لە هەمان کاتدا وەزیری دەرەوەی ئەمریکا رایگەیاند، وڵاتەکەیان هیچ پەیوەندییەکیان بە هێرشەکەی ئیسرائیلەوە نییە و داواش لە ئێران دەکات خۆی لە هێزەکانیان بەدوربگرێت.

تاوەکو ئێستا 5 گەڕی دانوستاندنی ئەتۆمی لەنێوان هەردوو ئێران و ئەمریکا بەنێوەندگیری عومان بەڕێوەچوون.