هێرشەكانی ئیسرائیل بۆ سەر ئێران، گەڕانەوەی حاجییانی هەرێمی لە ئاسمانییەوە بۆ وشكانی دەگۆڕێت

SNN-عەلی حەمە سەعید

وتەبێژی بەڕێوەبەرایەتی گشتی حەج و عومرەی هەرێم ئاماژە بەوەدەكات بەهۆی ئەو پێشهاتانەی كە لە نێوان ئێران و ئیسرائل ڕوویداوە گەڕانەوەی حاجییان لە ڕێگەی ئاسمانییەوە ئەگەر گرفتی بۆ دروست ببێت ئەوا بە ڕێگای وشكانی حاجییانمان دەگەڕێنینەوە بۆ هەرێم.

كاروان ستونی، وتەبێژی بەڕێوەبەرایەتی گشتی حەج و عومرەی هەرێم بە SNNی ڕاگەیاند: بە گوێرەی ئەو خشتەیەی دانرابوو وابڕیار بوو كە سبەی شەممە 14/6 یەكەم كاروانی حاجیانی هەرێم بەڕێگەی ئاسمانی بگەڕێنەوە هەرێمی كوردستان، بەڵام بەهۆی ئەو پێشهاتانەی كە هاتوونەتە ئاراوە ئاسمانی عێراق داخراوە بۆیە ئەگەر ئەم داخستنە بەردەوامی هەبێت پلانی جێگرەمان دەبێت.

ئاماژەی بەوەشكرد، بەڕێوەبەری گشتی حەج و عومرە لەگەڵ لایەنە پەیوەندیدارەكان لەسەر هێڵە ئەگەر ئەم داخستنە بۆماوەی چەند ڕۆژێكی دیكە درێژەی هەبێت، ئەوا بە ناچاری گەڕانەوەی حاجییان لە ڕێگەی ئاسمانییەوە دەگۆڕین بۆ وشكانی.

وتەبێژەكەی بەڕێوەبەرایەتی گشتی حەج و عومرەی هەرێم ئەوەشی وت، ئەو حاجیانەی كە لە دوێنێوە بە ڕێگای وشكانی دەستیان بە گەڕانەوە كردووە ئێستا گەیشتوونەتە خاكی عێراق، هاوكات ڕێگای وشكانی نێوان عێراق و سعودییەش ڕێگایەكی سەلامەتە و دەكرێت ئەو ڕێگایە وەك جێگرەوە بەكار بهێنین بۆ گەڕانەوەی حاجیانمان بۆ هەرێم.