دادگای فیدڕاڵی لەبارەی مووچەی مووچەخۆرانی هەرێمی کوردستان کۆدەبێتەوە

SNN-

ئەمڕۆ پێنجشەممە دادگای باڵای فیدراڵیی عێراق، لەسەر دوو سکاڵای سەرۆککۆمار و سەرۆکوەزیرانی عێراق کۆدەبێتەوە، چاوەڕواندەکرێت فەرمانێکى سالاری تایبەت بە مووچەی هەرێمی کوردستان دەربکات.

بەگوێرەى خشتەی دانیشتنەکانی دادگای فیدراڵی، لەو دوو سکاڵایەی لەلایەن سەرۆککۆمار و سەرۆکوەزیرانەوە تۆمارکراوە، داوای پاشگەزبوونەوەی دادگای فیدراڵی کراوە لە بڕیارێکی پێشووتری خۆی.

کۆبوونەوەی ئەمڕۆی دادگای فیدڕاڵی لەبارەی مووچە لەکاتێکدایە تاوەکو ئێستا فەرمانبەرانی هەرێمی کوردستان مووچەی مانگی پێنجیان وەرنەگرتووە هەروەها لە دوای جەژنی قوربانەوە دادگاکە کۆنەبووەتەوە بەهۆی ئەنجامدانی فەریزەی حەج لەلایەن ژمارەیەک دادوەری دادگای باڵای فیدراڵی.

هەروەها پێشەوا هەورامانی، وتەبێژی حکومەتی هەرێمی کوردستانیش رایگەیاند: چاوەڕێی بڕیاری دادگای فیدراڵیین و ئومێد هەیە لە بەرژەوەندیی مووچەخۆرانی هەرێمی کوردستان بێت. دەشڵێت: “بڕیارەکەی دادگای فیدراڵی تەنیا بۆ مووچەی مانگی پێنج نابێ، بەڵکوو بۆ مانگەکانی دیکەش دەبێت.”

پاش نووسراوێکی وەزارەتی دارایی عێراق لە 28ـی ئایاری 2025، بۆ حکومەتی هەرێمی کوردستان کە رایگەیاندبوو، هەرێمی کوردستان پشکی تەرخانکراوی دارایی نەماوە و مووچەی مانگی ئایار رەوانە ناکەن، ژمارەیەک فەرمانبەری هەرێمی کوردستان لە دادگای فیدراڵی سکاڵایەکەیان تۆمارکرد و داوایانکرد، فەرمانێکی سالاری لەبارەی نووسراوەکەی وەزارەتی دارایی دەربکات.