“ئیسرائیل شوێنی یۆرانیۆمە پیتێندراوەكانی ئێران دەزانێت”

SNN-

ماڵپەری  ئەكسیۆسی ئەمریكی بڵاویكردووەتەوە، بۆ پاراستنی لە هەر هێرشێكی دەرەكی، یۆرانیۆمی پیتێندراوی ئێران گواستراوەتەوە بۆ تۆنێلەكانی ژێر زەوی لە دامەزراوە ئەتۆمییەكانی فۆردۆ و ئەسفەهان.

سێ بەرپرسی باڵای ئیسرائیل كە قسەیان بۆ ماڵپەری ئەكسیۆسی ئەمریکی كردووە، ئەوەیان ئاشکرا کرد، یۆرانیۆمی پیتێندراوی ئێران، گواستراوەتەوە بۆ تونێلەکانی ژێر زەوی لە دامەزراوە ئەتۆمییەکانی فۆردۆ و ئەسفەهان، لە هەنگاوێکدا بۆ پاراستنی لە هەر هێرشێکی دەرەکی.

ماڵپەڕی “ئەکسیۆس”ی ئەمریکی، لە زاری ئەو بەرپرسانەوە کە ئاگاداری راپۆرتە هەواڵگرییە هەستیارەکانن، بڵاویكردووەتەوە، “ئەو دامەزراوانە لە ژێرزەوین، دوای هێرشەکانی ئەم دواییەی ئەمریکا و ئیسرائیل بە كرداری لە جیهانی دەرەوە پچڕاون، ئەوەش وادەكات قورس بێت بۆ ئێران بە خێرایی ئەم یۆرانیۆمە بەدەستبهێنێتەوە، یان لە هەر پەرەسەندنێکی ئەتۆمیدا بەکاریبهێنێت.”

بەگوێرەی ئەو ماڵپەڕە ئەمریکییە، بەرپرسانی ئیسرائیل پێیان وایە هەر هەوڵێکی ئێرانی بۆ بەدەستهێنانەوەی ئەو یۆرانیۆمە ئاشکرا دەکەن.