گەڕان بەدوای تەرمی مامۆستا ئاڤێستا لەم کاتەدا کۆتایی دێت

SNN

مامۆستا ئاڤێستا یوسف بەرزنجی، کە نزیکەی سێ مانگە لە ئاوی تەنگاتورە خنکاوە و تا ئێستا تەرمەکەی نەدۆزراوەتە، هەوڵەکانی بەرگری شارستانی سۆرانیش لەوبارەیەوە بەردەوامە.

کاروان میراودەلی، بەڕێوەبەری بەرگریی شارستانیی سۆران رایگەیاندووە، 5ی تەمموز دەبێتە سێ مانگ بەسەر ونبوونی ئاڤێستا، بۆیە ئەو کات دەست لە گەڕان هەڵدەگرین و راپۆرتی کۆتایی پێشکەشی لایەنی پەیوەندیدار دەکەین لەسەر ئەنجامی گەڕانەکە لەو ماوەیەدا.

ئاماژەی بەوەکردووە، هەشت تیمی بەرگریی شارستانیی سۆران کە نزیکەی 60 کەس دەبن رۆژانە بەردەوام لەگەڵ خێزانی ئاڤێستا لە گەڕان بەردەوامن.

هاوکات، لە دوایین رۆژدا هەوڵەکانیان زیاتر چڕ دەکەنەوە و 100 کارمەند بەدوایدا دەگەڕێن.

ئاڤێستا یوسفی تەمەن 27 ساڵ، رۆژی 5ـی نیسانی 2025 لە سنووری قەزای مێرگەسۆر لە ئیدارەی سەربەخۆی سۆران لەکاتی رزگارکردنی براکەیدا کەوتە ناو رووباری تەنگاتوورەوە و لەوکاتەوە تەرمەکەی نەدۆزراوەتە، باوکیشی لە لێدوانێکدا وتوویەتی “تاکو تەرمی کچەکەم نەدۆزمەوە ناگەڕێمەوە و رووبارەکە بەجێناهێڵم”.