ئەپیکور: چاوەڕێی وەڵامی سودانین بۆ هەناردەکردنەوەی نەوتی هەرێم

SNN

کۆمەڵەی پیشەسازی نەوتی کوردستان ناسراو بە “ئەپیکور” رایگەیاندووە، چاوەڕوانى واژووى محەمەد شیاع سودانی دەکات بۆ دەستپێکردنەوەى هەناردەى نەوت، هاوکات دەیانەوێت داواکارییەکانیشیان جێبەجێبکرێت.

ئەمڕۆ یەکشەممە 6ی تەمموز مایڵز کاگینز، گوتەبێژی ئەپیکور راگەیاند، دۆسییەی هەناردەکردنەوەی نەوتی هەرێمی کوردستان لە بەردەستی سەرۆکوەزیرانی عێراقدایە و چاوەڕوانى واژووى ئەو دەکەن.

ئاماژەی بەوەکردووە، مەرج و داواکارییەکانی ئەوان گۆڕانکاریی بەسەردا نەهاتووە و هەمان مەرج و داواکاییەکانی پێشووە و دەیانەوێت وەک خۆی جێبەجێ بکرێت.

مەرجەکانی ئەپیکور بۆ هەناردەکردنەوەی نەوتی هەرێم کە خۆیان پێشتر ئاشکرایانکردووە بریتین لە، دڵنیایی بدرێت کە شایستە داراییەکانی کۆمپانیاکان بدرێت و مەرجە ئابووری و بازرگانییەکانیشیان بپارێزرێت، هاوکات پێدانەوەى یەک ملیار دۆلار قەرز کە لەلای حکومەتى هەرێمى کوردستانە و پارەى تێچووى بەرهەمهێنانى نەوتە لە تشرینى یەکەمى 2022 تاوەکو ئازارى 2023ـیە.

ئەپیکور، لە هەشت کۆمپانیای بیانی بوارى نەوت پێکهاتووە و 60%ـی نەوتی هەرێمی کوردستان بەرهەمدەهێنن، پاش راگرتنى هەناردەش ئێستا رۆژانە 250 هەزار بەرمیل نەوت بەرهەمدەهێنن.