SNN-عەلی حەمە سەعید
ئەندامێكی ئەنجومەنی نوێنەرانی عێراق ئاماژە بەوەدەكات تا ئێستا گفتوگۆكانی نێوان شاندی هەرێم و حكومەتی عێراقی بەردەوامییان هەیە و كۆتایی بە گفتوگۆكان نەهاتووە، جەختیشدەكاتەوە كە لایەنی سێیەم هاتووەتە ناو گفتوۆكانەوە كە ئەمەریكایە و فشاری لەسەر هەردوولا دروستكردووە بۆ گەیشتن بەڕێككەوتن.
غەریب ئەحمەد، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی راگەیاند: تا ئێستا گفتوگۆكانی نێوان هەولێر و بەغدا بۆ گەیشتن بەڕێككەوتن بەردەوامیان هەیە هەرچەندە تا ڕادەیەك ڕاجیاوازی و لێكتێنەگەیشتن هەیە لەنێوان هەردولادا، بەڵام ئەمە بەمانای بەبنبەست گەیشتنی گفتوگۆكان نایەت.
ئاماژەی بەوەشكرد، ئەوەی تا ئێستا گرفتی سەرەكییە لە گفتوگۆكان بابەتی دۆسیەی نەوت و بڕی بەرهەمهێنان و ڕادەستكردنی نەوتە بە كۆمپانیای سۆمۆ، هاوكات بابەتی گەڕاندنەوەی داهاتی نانەوتی و تەوتین و ئینفاقی فیعلی هێشتا لەسەر مێزی گفتوۆكاندان و ڕێككەوتنی كۆتاییان لەبارەوە نەكراوە.
ئەو ئەندامەی ئەنجومەنی نوێنەرانی عێراق ئەوەشی ڕوونكردەوە، ئێستا لایەنی سێیەم هاتووەتە ناو گفتوگۆكانی نێوان هەولێر و بەغدا كە ئەویش لایەنی ئەمەركییە، بەجۆرێك لەڕێگەی كونسوڵخانەی ئەمەریكاوە فشار خراوەتە سەر هەردولا بۆ ئەوەی بگەن بەڕێككەوتن، بۆیە ئەمڕۆ ڕۆژێكی یەكلاكەرەوە دەبێت.
