“مەسعود پزشكیان لە هێرشێکی ئیسرائیلدا برینداربوو”

SNN-

ئاژانسی هەواڵی فارس وردەکاریی هێرشێکی ئیسرائیلی بڵاوکردەوە کە کۆبوونەوەی ئەنجومەنی باڵای ئاسایشی نیشتمانیی ئێرانی کردە ئامانج لە رۆژانی دەستپێکی هێرشەکاندا.

بەپێی ئاژانسەکە، هێرشەکە پێشنیوەڕۆی رۆژی 15ی مانگی رابردوو ئەنجامدراوە کۆبوونەوەی ئەنجومەنی باڵای ئاسایشی نیشتمانیی ئێرانی کردە ئامانج کە جگە لە مەسعود پزیشکیان، سەرۆک کۆماری ئێران، چەند سەرکردەیەکی دیکەی حکومی و سەربازیی وڵاتەکەی تێدابووە و کۆبوونەوەکە لە ژێرزەمینی باڵەخانەیەکی تاران بەڕێوەچووە.

باسی لەوەشکردووە، لە هێرشەکەدا شەش مووشەک بەکارهێنراون، رێڕەوەکانی چوونە ژوورەوە و دەرچوونی باڵەخانەکەیان کردووەتە ئامانج بۆ ئەوەی دەروازەکانی هەواگۆڕکێ بگیرێن و ئەو بەرپرسانە بخنکێن، هەروەها کارەبای باڵەخانەکەش دەستبەجێ بڕاوە.

بەپێی ئاژانسی فارس، بەرپرسانی بەشدار لە کۆبوونەوەکە توانیویانە لەڕێگەی رێڕەوێکەوە کە پیشتر لە باڵەخانەکەدا ئامادەکراوە دەربازیان ببن، بەڵام مەسعود پزیشکیانی سەرۆک کۆمار قاچی برینداربووە.