SNN-نهێنی پشت دواخستنی بڕیاری دادگای فیدراڵی بۆ 28 ی مانگ ئاشكرا دەكات
SNN-عەلی حەمە سەعید
لەگەڵ ئەوەی هەموو هیواكان لەسەر ئەوەبوون كە ئەمڕۆ دادگای باڵای فیدراڵی عێراق لە كۆبوونەوەی خۆیدا ئەمرێكی وەلائی دەربكات بۆ ڕاگرتنی كاركردن بە نوسراوێكی وەزارەتی دارایی عێراق لەبارەی ناردنی پارەی بۆ مووچەی فەرمانبەرانی هەرێم، بەڵام ئەوە ڕووینەدا و SNN-یش هۆكارەكەی ئاشكرا دەكات.
بەگوێرەی ئەو زانیارییانەی كە لە بەرپرسێكی كورد لە بەغدا بە SNN-دراون ئەوە خراوەتەڕوو، هۆكاری پشت دەرنەكردنی فەرمان سالاری بۆ ئەوە دەگەڕێتەوە كە دادگای باڵای فیدراڵی بە ڕوونی بەهەردوولایەنی حكومەتی هەرێم و عێراقی ڕاگەیاندووە كە ئەوان نابنە لایەنی سێیەم لە كێشەكانی نێوان هەولێر و بەغدا، بەڵكو داوای لێكردوون كە ئەوەی لە یاسای بودجەی گشتی عێراق هاتووە جێبەجێی بكەن گرفتەكان چارەسەر دەبن.
ئاماژە بەوەشكراوە، ئەم دواخستنەوەی ئەمڕۆی دادگای باڵای فیدراڵی بۆ 28 ی مانگ پەیامێكی دیكەیە بۆ حكومەتی هەرێم لەبری ئەوەی پشت بە دادگا و دەركردنی بڕیاری دادگا ببەستێت بۆ ناردنی پارە، واباشترە كە پابەند بێت بە پرۆژە یاسای بودجەی گشتی و هەروەها ئەو بڕیارانەی دادگای فیدراڵی كە پێشتر لەسەر ئەو دۆسیەیە دەركراون.
ئەو بەرپرسەی كورد لە بەغدا ئەوەشی وت، هەموو ئاماژەكان بەو ئاڕاستەیەن كە دەبێت هەردوو حكومەتی هەرێم و عێراق بۆخۆیان بگەنە ڕێككەوتن نەك چاوەڕێی دادگای فیدراڵی بكەن بڕیاریان بۆ دەربكات، چونكە پێشتر دادگا بڕیاری دەركردووە و لەسەر هەردولا پێویستە كە پابەند بن بە بڕیارەكانی پێشووی دادگاوە.
