راگەیەنراوی کۆبوونەوەکەی بافڵ جەلال تاڵەبانی و محەمەد شیاع سودانی

SNN

دوای ئەوەی ئەمشەو بافڵ جەلال تاڵەبانی لەگەڵ محەمەد شیاع سودانی لە بەغدا کۆبوونەوە، نوسینگەی سەرۆکوەزیرانی عێراق ناوەڕۆکی کۆبوونەوەکەیان بڵاوکردەوە، تیایدا باسی نەوت و مووچە کراوە.

ئەمڕۆ 15ی تەمموز، نوسینگەی محەمەد شیاع سودانی راگەیەنراوێکیان لە بارەی کۆبوونەوەکەی سودانی لەگەڵ بافڵ جەلال تاڵەبانی سەرۆکی یەکێتیی نیشتیمانی کوردستان بڵاوکردەوە و ئاشکرایکرد، کە لە کۆبوونەوەکەدا تاوتوێ چەندین پرسیان کردووە، لەوانە مووچە و پرسی رادەستکردنی داهاتی نەوتی و نانەوتی هەرێمی کوردستان.

دەقی راگەیەنراوەکەی نوسینگەی سەرۆکوەزیرانی عێراق:

سەرۆکی ئەنجومەنی وەزیران بەڕێز محەمەد شەیاع سودانی، ئەمڕۆ سێشەممە 15ی تەمموز، پێشوازی كرد لە سەرۆکی یەکێتی نیشتمانى کوردستان بەڕێز بافڵ تاڵەبانی.

لە میانەی دیدارەکەدا تاوتوێی کۆمەڵێک پرس و دۆسیەی نیشتیمانی کرا، هەروەها باس لە پرسی ڕادەستکردنی داهاتی نەوت و نانەوتی هەرێمی کوردستانی عێراق و مووچەی فەرمانبەرانی کرا، و گرنگی هەماهەنگی و کارکردن بۆ چارەسەرکردنی دۆسیە هاوبەشەکان، بە گوێرەی چوارچێوە دەستووری و یاساییە کارپێکراوەکان و بڕیارەکەی دادگای فیدراڵی لەم بارەیەوە.

لە بەشێکی تری دیدارەکەدا پێداچوونەوە بە ئامادەکارییە بەردەوامەکان کرا، بۆ ئەنجامدانی هەڵبژاردنەکانی پەرلەمان لە وادەی دیاریکراوی خۆیدا، و پێویستە ئەنجامەکانی گوزارشت لە خواستی ڕاستەقینەی گەلی عێراق بکات، ئەمەش لە ڕێگەی هەڵبژاردنی نوێنەرانیانەوە بۆ ئەنجوومەنی نوێنەران.

نوسینگەی ڕاگەیاندنی سەرۆکی ئەنجومەنی وەزیران