“سبەینێ حکومەتی هەرێم 120 ملیار دینار بۆ بەغدا دەنێرێت”
مووچە بودجە
SNN-عەلی حەمە سەعید
دوای ئەوەی بە هەوڵەكانی سەرۆكی یەكێتی نیشتمانی كوردستان هەریەكە لە حكومەتی عێراق و حكومەتی هەرێم توانیان بگەنە ڕێككەوتن لەبارەی دۆسیەی نەوت و داهات و ناردنی مووچە، وابڕیارە سبەی یەكشەممە هەرێمیوردستان بڕی 120 ملیار دینار ڕەوانەی عێراق بكات.
بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNN-ی دراون، لە چوارچێوەی جێبەجێكردنی هەنگاوەكانی رێككەوتنە نوێیەكەی نێوان هەولێر و بەغدا، وابڕیارە سبەی یەكشەممە هەرێمی كوردستان یەكەم هەنگاو بنێت و بڕی 120 ملیار دینار وەك داهاتی نانەوتی بۆ مانگی پێنج ڕەوانەی بەغدا بكات.
ئاماژەی بەوەشكرد، بەگوێرەی ئەو ڕێككەوتنەی كراوە، دەبێت هەرێمی كوردستان بڕی 240 ملیار دینار ڕەوانە بكات، بۆیە لەگەڵ ناردنی مووچەی مانگی پێنج كە بڕەكەی زیاتر لە 960 ملیار دینارە لەلایەن بەغداوە، ئەوكات هەرێمی كوردستانیش بڕی 120 ملیاری دیكە دەنێرێت بۆ ناردنی مووچەی مانگی شەش.
ئەو بەرپرسەی وەزارەتی دارایی ئەوەشی خستەڕوو، سبەی هەرێم ئەو بڕە پارەیە دەنێرێت، بەدڵنیاییەوە هەر لەم هەفتەیەشدا لەنێوان دووشەممە تا سێشەممە عێراقیش بڕی 960 ملیار دەنێرێت و هەرلەم هەفتەیەدا دەستبەدابەشکردنی مووچە دەكرێت، پاشان مووچەی مانگەكانی دیكە دابەشدەكرێت.
