نوێترین زانیاری لەبارەی خەرجكردنەوەی 100 هەزارەکەی لەخانەنشینان بڕدراوە

SNN-عەلی حەمە سەعید

بڕی ئەو 100 هەزار دینارەی كە لەمانگی یەكی ئەمساڵەوە لە مووچەی خانەنشینان بڕدراوە، لە لیستی مووچەی مانگی پێنجی خانەنشینانی هەرێم نەخراوەتەوە سەر مووچەكانیان، هاوكات بەرپرسێكی وەزارەتی دارایش هۆكارەی ئاشكرا دەكات

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوەخراوەتەڕوو، بڕی ئەو 100 هەزار دینارەی كە بۆ مووچەی خانەنشنیان زیاد كراوە بە بڕیارێكی تایبەتی (محەمەد شیاع سودانی) سەرۆكوەزیرانی عێراق بووە و پەیوەندی بە یاسای خانەنشینی یەكگرتووی عێراقەوە نییە و وەك مینحەیەك خراوەتە سەر مووچەی خانەنشینی.

ئاماژەی بەوەشكرد، هەر بڕەپارەیەك بە یاسا بڕیاری لەبارەوە نەدرابوو یاخود ناوی مینحەی لێنرابوو، ئەوا دەبێت ساڵانە بڕیاری نوێ‌ بۆ خەرجكردنی ئەو مینحەیە دەربكرێت، بەڵام تاوەکو ئێستا سەرۆكوەزیرانی عێراق واژۆی لەسەر ئەو نوسراوە نەكردووە كە تایبەت بە خەرجكردنەوەی ئەو 100 هەزار دینارەی كە دەچێتە سەر مووچەی ئەو خانەنشینانەی مووچەكانیان لە ملیۆنێك دینار كەمترە.

ئەو بەرپرسەی وەزارەتی دارایی ئەوەشی خستەڕوو، لە مووچەی چوار مانگی ڕابردوو ئەو 100 هەزار دینارە خەرجەنەكراوە، بۆ ئەم مانگەش بە هەمان شێوە لە لیستی خانەنشینان 100 هەزار دینارەكە نەخراوەتەوە سەر مووچەكانیان، بەڵام ئەگەر لەمانگی داهاتوو سەرۆكوەزیرانی عێراق بڕیار لەسەر خەرجكردنی بدات ئەوا سەرجەم ئەو 100 هەزار دینارانەی خەرج نەكراون بۆیان خەرجدەكرێتەوە.