“ڕێزگرتنی لایەنە عێراقییەكان بۆ پێگەی بەهێزی بافڵ تاڵەبانی هۆكارێكی دیكەی ناردنی مووچەیە”

SNN-عەلی حەمە سەعید
وتەبێژی فراكسیۆنی یەكێتی لە پەرلەمانی عێراق ئاماژە بەوەدەكات، سەرەڕای ئەوەی سەرۆك بافڵ مەبەستی سەرەكی ئەوەبوو كە دەبێت بەهەرنرخێك بێت كێشەی مووچەی فەرمانبەرانی هەرێم چارەسەر بكات، بەڵام لایەنە عێراقییەكانیش حسابێكی تایبەتیان بۆ پێگەی سەرۆی یەكێتی هەیە، ئەوەش هۆكارێكی دیكەی چارەسەری كێشەی مووچەیە.

سۆزان مەنسور، وتەبێژی فراكسیۆنی یەكێتی لە ئەنجومەنی نوێنەرانی عێراق بە SNNی ڕاگەیاند: لەماوەكانی ڕابردوودا هەموو لایەنە عێراقییەكان ئەو ڕاستییەیان بۆ ڕوونبووەتەوە كە یەكێتی نشتیمانی كوردستان و خودی ( بافل جەلال تاڵەبانی) سەرۆكی یەكێتی بەڕاستی لەخەمی ئەوەدایە كە كێشەكانی نێوان هەولێر و بەغدا چارەسەر بكات، نەك بەشێوەیەكی كاتی و بۆماوەیەكی دیاریكراو بێت.

ئاماژەی بەوەشكرد، هەر ئەو خەمخۆرییەی سەرۆك بافڵ وایكردووە كە پێگەیەكی بەهێزی هەبێت لە ناو هێزە سیاسییەكانی عێراق و هەرێمی كوردستان، دواجاریش ڕێزگرتن لەو پێگە بەهێزە كە هەیەتی وایكرد هۆكارێكی دیكە بێت گرفتی مووچەی فەرمانبەرانی هەرێم بە ئاسانی چارەسەر بكرێت.

وتەبێژەكەی فراكسیۆنی یەكێتی ئەوەشی خستەڕوو، ئەوەی زیاتر جێی خۆشحاڵییە كە جێگای سەرۆك مام جەلال بە بەتاڵی نەماوەتەوە بەڵكوو هەریەكە لە ( بافل جەلال تاڵەبانی و قوباد جەلال تاڵەبانی) توانیویانە بە هەوڵ و تێكۆشانی خۆیان ببنە جێگای متمانەی كۆمەڵانی خەڵكی كوردستان و ئەو گرفتانەی كە چارەسەركردنیان قورس و گرانە بەوانی دەسپێرن بۆ ئەوەی بە ئاسانی چارەسەری بكەن.