سبەنینێ سەرۆككۆماری عێراق سەردانی هەڵەبجە دەكات و بەفەرمی هەڵەبجە وەك پارێزگایەكی نوێ دەناسێنێت
لەتیف رەشید
SNN-عەلی حەمە سەعید
وابڕیارە سبەی چوارشەممە سەرۆككۆماری عێراق سەردانی پارێزگای هەڵەبجە بكات و لەگەڵ پارێزگار و یەكە ئیدارییەكانی پارێزگاكە كۆببێتەوە، ئەوەش بەمەبەستی گەیاندنی پەیامی پیرۆزبایی بە خەڵكی هەڵەبجە بەبۆنەی بەپارێزگاكردنی شارەكەیانەوە.
چرۆ حەمەشەریف، ئەندامی ئەنجومەنی نوێنەرانی عێراق و نوێنەری هەڵەبجە لە پەرلەمانی عێراق بە SNNی ڕاگەیاند: لە لایەن نوسینگەی ( د. عەبدولەتیف ڕەشید) سەرۆك كۆماری عێراق ئاگادار كراینەوە كە سبەی چوارشەممە سەرۆككۆماری عێراق سەردانێكی فەرمی بۆ پارێزگای هەڵەبجە ئەنجام دەدات.
ئاماژەی بەوەشكرد، لە سەردانەكەیدا لەگەڵ پارێزگاری هەڵەبجە و بەرپرسی یەكە ئیدارییەكانی هەڵەبجە كۆدەبێتەوە و گوێ لەداواكارییەكانیان دەگرێت، هاوكات سەرۆككۆمار پیرۆزبایی خۆیشی لە خەڵكی هەڵەبجە دەكات بە بۆنەی بە پارێزگاكردنی هەڵەبجە و تێپەڕاندنی بەربەستەكانی بە پارێزگاكردنی شارەكەیان.
ئەو سەردانەی سەرۆككۆمار لەكاتێكدایە كە هەر ئەمڕۆ دادگای باڵای فیدراڵی سەرجەم ئەو سكاڵایانەی ڕتكردەوە كە لەبارەی بە پارێزگاكردنی هەڵەبجە تۆماركرابوون، بەوجۆرەش هەڵەبجە بە فەرمی بوویە 19 هەمین پارێزگای عێراق.
