عێراق وردبینی بۆ لیستی مووچەی مانگی شەش دەكات و هەرێمیش لیستی مووچەی مانگی حەوت ئامادە دەكات

SNN-عەلی حەمە سەعید
ئەندامێكی ئەنجوومەنی نوێنەرانی عێراق ئاماژە بەوەدەكات، دوای ئەوەی گرفتی ناردنی پارەی مووچەی مانگی پێنج چارەسەربوو، لە ئێستادا وەزارەتی دارایی عێراق وربینی لە لیستی مووچەی مانگی شەش دەكات، هاوكات وەزارەتی دارایی هەرێمیش لیستی مووچەی مانگی حەوت ئامادە دەكات.

سروە محەمەد، ئەندامی ئەنجوومەنی نوێنەرانی عێراق لە فراكسیۆنی یەكێتی بە SNNی ڕاگەیاند: دوای ئەوەی بە هەوڵەكانی بافل جەلال تاڵەبانی سەرۆكی یەكێتی تواندرا گرفتی ناردنی پارەی مووچەی مانگی پێنج چارەسەربكرێت، هەوڵەكان بەگەڕخراونەتەوە بۆ ئەوەی لە زوترین كاتیشدا پارەی مووچەی مانگی شەش ڕەوانە بكرێت، بۆ ئەومەبەستەش وەك پەرلەمانتارانی یەكێتی بە بەردەوامی لەگەڵ لایەنە پەیوەندیدارەكان لە هەماهەنگی و پەیوەندیدان بۆ بەدواداچوونی پرسی مووچە و چارەسەركردنی كێشەكان.

ئاماژەی بەوەشكرد، ئەوەی بە ئێمە وتراوە لەسەر مووچەی مانگی شەش ئەوەیە كە وەزارەتی دارایی عێراق دەستیان كردووە بە وردبینیكردن لە لیستی مووچەی مانگی شەش، هاوكات لیژنەیەكی تەكنیكی حكومەتی هەرێمیش لە بەغدان بۆ وەڵامدانەوەی هەر تێبینی و سەرنجێك كە لەلایەن عێراقەوە دروست ببێت لەسەر لیستەكەو چارەسەركردنی كێشەكانی مووچە بۆ مانگی شەش.

ئەو پەرلەمانتارە كوردە لە فراكسیۆنی یەكێتی ئەوەشی خستەڕوو، ئەگەر هەردوو حكومەتی هەرێم و عێراق پابەند ببن بە ڕێككەوتنەكەی نێوانیانەوە، ئەوا لە نزیكترین كاتدا مووچەی مانگی شەشیش دابەشدەكرێت و هاوكات وەزارەتی دارایی هەرێمیش دەستیان بە ئامادەكردنی لیستی مووچەی مانگی حەوت كردووە.