ئێران: ئەگەر دوژمنكارییەكان دووبارەبێتەوە بە هێزێكی زیاترەوە وەڵام دەدەینەوە

SNN-

وەزیری دەرەوەی ئێران وەڵامی دۆناڵد ترەمپ دەداتەوە و دەڵێت: ئێران نەتەوەیەکە، خاوەن کولتورێکی دەوڵەمەندە، کە دەگاتە حەوت هەزار ساڵ شارستانیەت، هەرگیز وەڵامی زمانی هەڕەشەو تۆقاندن ناداتەوە، ئێرانییەکان هەرگیز نەچەماون بۆ هیچ بێگانەیەک، جگە لە رێزگرتن وەڵامی هیچ نادەنەوە.

عەباس عراقچی، لە پۆستێکدا لە تۆڕی کۆمەڵایەتی “ئێکس” نوسیویەتی: ئەگەر دوژمنكارییەكان دووبارە بێتەوە، بێ گومان بە هێزێكی زیاترەوە وەڵام دەدەینەوە.

دەشڵێت:”ئەگەر مەترسییەك هەبێت سەبارەت بە ئەگەری گۆڕانی بەرنامە ئەتۆمییەکەمان بۆ مەبەستی نائاشتیانە، ئەوا سەلمێنراوە كە بژاردەی سەربازی کاریگەری نییە، بەڵام رەنگە چارەسەری دانوستانکاری سەرکەوتوو بێت.

ئەو وتانەی عراقچی دوای ئەو هەڕەشانەی دۆناڵد ترەمپ، سەرۆکی ویلایەتە یەکگرتوەکانی ئەمریکا دێت، کە دوێنێ‌ لە میانەی سەردانەکەی بۆ سکۆتلەندا رایگەیاند، كاتێك وتی: توانا ئەتۆمییەکانی ئێرانمان لەناوبردووە، دەتوانن سەرلەنوێ دەستپێبکەنەوە، بەڵام ئەگەر ئەوە بكەن، لەچاوتروكانێكدا لە ناویان دەبەینەوە.