رەزامەندیمان لەسەر تێكەڵكردنی هەسەدە لەگەڵ سوپای سوریا نیشانداوە

SNN

مەزڵوم عەبدی فەرماندەی گشتی هێزەكانی سوریای دیموكرات هەسەدە رایدەگەیەنێت كاردەكەن بۆ فراوانكردن و جێبەجێكردنی رێككەوتنەكەی 10ی ئازاری رابردوو كە لەگەڵ ئەحمەد شەرع سەرۆك كۆماری كاتی سوریا واژووکراوە، بەڵام ئێستا كار لەسەر وردەكارییەكان دەكەن.

فەرماندەی گشتیی هێزەكانی سوریای دیموكرات لەچاوپێكەوتنێكدا لەبارەی دۆخی سوریا و رێككەوتنەكەی 10ی ئاداری رابردوو ئاماژەی بەوەكرد، هەرچەندە جێبەجێكردنی رێككەوتنە 10 خاڵییەكەی 10ی ئاداری رابردوو، لەگەڵ ئەحمەد شەرع بەلاوازی بەڕێوەدەچێت، بەڵام كاردەكەن بۆ فراوانكردن و جێبەجێكردنی.

باسی لەوەشكرد رەزامەندییان لەسەر تێكەڵكردنی هێزەكانی هەسەدە لەگەڵ سوپای سوریا نیشانداوە، بەڵام دەبێت كار لەسەر وردەكارییەكان بكەن بۆ ئەوەی سەقامگیریی تێكنەچێت و هیچ لایەنێك بۆشایی ئەمنی نەقۆزێتەوە.