بەڕێوەبەری كۆمپانیای سۆمۆ:هەرێم تا ئێستا هیچ بڕە نەوتێکی خۆی رادەست نەکردووە

SNN-

عەلی نزار فایق، بەڕێوەبەری گشتیی كۆمپانیای نیشتمانی بەبازاڕکردنی نەوت (سۆمۆ)، بە ئاژانسی هەواڵی عێراقی راگەیاندووە کە هەرێم تا ئێستا هیچ بڕە نەوتێکی خۆی رادەست نەکردووە، دەشڵێت: ئامادەن بۆ وەرگرتنی هەر بڕە پارەیەک لەلایەن هەرێمەوە رادەستبکرێت و هەموو رێکارەكانی گرێبەستی بۆ هەناردەکردنی نەوت لە رێگەی بەندەری جەیهانی تورکیاوە تەواوکردووە

دەشڵێت:بەندەرەکانی عێراق پارێزراون و بە هەماهەنگیەکی بەرز لەگەڵ دەزگا ئەمنییەکان و کارپێکەران بەڕێوەدەبرێن و ئەو بەڵگەنامە دزەپێکراوەی بڵاوكرایەوە راستەقینەیە، بەڵام رێکارێکی رۆتینییە و ئامانج لێی کۆنترۆڵکردنی خشتەكانی بارکردنی نەوتهەڵگرەکانە.

راشیگەیاندووە، بەڵگەنامەکە تەنها ئاڕاستەی دەزگا ئەمنییە پەیوەندیدارەکان کراوە، بۆ دڵنیابوون لە توندی رێوشوێنەكان بەسەر کارەکانی هەناردەکردندا و هەر نەوتهەڵگرێك گومانی لێبكرێت لەلایەن لایەنە پەیوەندیدارەکانەوە دەدۆزرێتەوە.

بەڕێوەبەری گشتیی كۆمپانیای نیشتمانی بەبازاڕکردنی نەوت (سۆمۆ) دەشڵێت: هیچ مامەڵەیەک لە ئێستاو داهاتوو لەگەڵ کۆمپانیا یان ئەو لایەنانەدا ناكرێت کە سزایان بەسەردا سەپێنراوە و رێوشوێن دەگیرێتەبەر بۆ دەرکردنی هەر نەوتهەڵگرێكی گوماناوی لە ئاوە هەرێمایەتیەكانی عێراق.

راشیگەیاندووە کە هەناردەی نەوتی رۆژانەی عێراق لە نێوان (3.35)ملیۆن بۆ (3.4) ملیۆن بەرمیلدایە، کە (78%)بۆ (80%)ی بۆ بازاڕەکانی ئاسیا دەچێت و کەمتر لە(20%)ی ئەو بارانەی کە دەمێننەوە دەچنە بازاڕەکانی ئەوروپا، ئەوەی دەمێنێتەوە بۆ ئەمەریکا.