سبەی ئەنجومەنی وەزیرانی هەرێم كۆنابێتەوە و هیچ بەرەو پێش چوونێكیش لەگەڵ بەغدا نییە
SNN-عەلی حەمە سەعید
هەرچەندە دەبێت هەموو ڕۆژانێكی چوار شەممە كۆبوونەوەی ئەنجومەنی وەزیرانی هەرێم بەڕێوەبچێت، بەڵام سبەی چوارشەممە ئەنجومەنی وەزیرانی هەرێم كۆنابێتەوە، ئەوەش بەهۆی ئەوەی هیچ بەرەو پێشچوونێك لەگەڵ بەغدا نەهاتووەتە ئاراوە بۆناردنی مووچەی مانگی شەش.
بەگوێرەی ئەو زانیارییانەی كە دەستSNNكەوتوون ئەوەخراوەتەڕوو، سبەی چوار شەممە كۆبوونەوەی ئەنجومەنی وەزیرانی هەرێم بەڕێوەناچێت و وەزیرەكان بانگهێشتی كۆبوونەوە نەكراون.
لە زانیارییەکان ئەوەش هاتووە، ماوەی چەند مانگێكە كۆبوونەوەكانی ئەنجومەنی وەزیران تایبەت كراوە بە گفتوگۆكانی نێوان هەولێر و بەغدا لەسەر بابەتی مووچە و ڕادەستكردنی نەوت و داهاتی ناوخۆیی، بەلام لە ئێستادا دوای ناردنی پارەی مووچەی مانگی پێنج تاڕادەیەكی زۆر گفتوگۆكان بە بنبەست گەیشتوون، بۆیە ئەنجومەنی وەزیرانی هەرێمیش كۆنابێتەوە.
كۆنەبوونەوەی ئەنجومەنی وەزیرانی هەرێم لە كاتێكدا كە حكومەتی عێراقی دەستیكردووە بە دابەشكردنی مووچەی مانگی هەشت، بەڵام تا ئێستا دیار نییە كەی مووچەی مانگەكانی شەش و حەوتی فەرمانبەرانی هەرێم دابەشدەكرێت و هیچ بڕیارێكیش نییە بۆناردنی پارە لە بەغداوە.
