بەڕێوەبەرایەتی کارەبای سلێمانی: سیستمی به‌رهه‌مهێنانی كارەبا له‌ وزەی خۆر لەشەش مانگدا بەڕێژەی 100% زیادیكردووە

SNN-

بەڕێوەبەرایەتی کارەبای سلێمانی رایگەیاند، بە پێی ئامارەكانی بەشی وزە نوێبووەكانی بەڕێوەبەرایەتی گشتیمان لە سنوری پارێزگای سلێمانی رۆژ لەدوای رۆژ هاوڵاتیان روو لە دانانی سیستمی كارەبای وزەی خۆر دەكەن و لە ماوەی شەش مانگی رابردوودا بەڕێژەی (100%) زیادیكردوە.

ئاماژەی بەوەشکردووە، بەپییی کۆتا ئامار لە بەرێوەبەرایەتییەکەیان، تا بەرواری 4-8-2025 ژمارەی ئەو هاوبەشانەی كارەبا كە سیستمەكەیان داناوە و لە بەشی وزە نوێبووەكان تۆماركراوە، گەیشتوەتە (1033) هاوبەش و بڕی بەرهه‌مهێنانی كارەبایان (23.370) مێگاوات بووە.

دەشڵێت، لە كاتێكدا تابەرواری 19-2-2025 ژمارەی ئەو هاوبەشانەی كارەبا كە سیستمەكەیان دانابوو (510) هاوبەش بوون.

وزەی خۆر یەكێكە لە وزە نوێبووەكان بۆ بەرهەمهێنانی کارەبا، دۆستی ژینگەیە و ئێستا لەسەر ئاستی وڵاتانی جیهان بەكارهێنانی لەبرەودایە، لە هەرێمی كوردستانیش سیستمەکە لەلایەن هاووڵاتیانەوە لەسەربانی خانوو یان باڵەخانەی بازرگانی و كارگەكان و كەرتی كشتوكاڵ بۆ بەرهەمهێنانی کارەبا دانراوە و رۆژ لەدوای رۆژ بەكارهێنانی لە زیادبوونە.