جەی دی ڤانس: داگیرکردنی غەززە لە کۆتاییدا بۆ نەتانیاهۆ دەگەڕێتەوە

SNN

جێگری سەرۆکی ئەمریکا لە لێدوانێکی میدیایدا رایگەیاند، بڕیاری داگیرکردنی کەرتی غەززە لە کۆتاییدا لەلایەن نەتانیاهۆ سەرۆکوەزیرانی ئیسرائیلەوە دەدرێت، دەشڵێت “ئەم کارە لایەنی ئەرێنی و نەرێنیشی هەیە”.

جەی دی ڤانس، جێگری سەرۆکی ئەمریکا دۆناڵد ترەمپ لە لێدوانێکدا بۆ فۆکس نیوزی ئەمریکی راگەیاندووە، ویلایەتە یەکگرتووەکانی ئەمریکا لە غەززە کاردەکات بۆ بەدەستهێنانی سێ ئامانجی سەرەکی، یەکەمیان نەمانی توانی حەمماسە بۆ شەڕ، دووەمیان گرەنتی گەڕانەوەی دیلەکانە بۆ زێدی خۆیان، سێیەمان گرەنتی پێدانی خۆراک و دەرمانە بۆ دانیشتووانی غەززە.

ئاماژەی بەوەکردووە، ترەمپ دەیەوێت ئاشتی بەدیبێت، هەموو هەوڵێکیش دەدات بۆ کۆتایهاتن بە شەڕ و ئەنجامدانی گفتوگۆی دیبلۆماسیانە، هاوکات بەدەستگەیشتنی هاوکارییەکان بۆ دیلەکان بەبێ هیچ مەرج و رێسایەک.

ڤانس دەڵێت “بەهۆی ئەوەی حەمماس چەک دانانێت و ئامادەیی نیشاننەداوە بۆ دانانی چەک هەر بۆیە ئیسرائیل هیچ رێگاچارەیەکی تری نەبووە لە غەززە جگە لە جەنگ” .

لەبارەی داگیرکردنی غەززەوە ئاشکرایکردووە، ئەم بڕیارە دواجار بەدەست نەتانیاهۆ سەرۆکوەزیرانی ئیسرائیلە، هەڵبەتە بڕیارەکەش لایەنی ئەرێنی و نەرێنیشی هەیە.