زانیاری نوێ لەبارەی هەناردەركردنەوەی نەوت و ناردنی مووچە ڕاگەیەندرا
SNN-عەلی حەمە سەعید
ئەندامێكی لیژنەی دارایی لە خولی پێشووی پەرلەمانی عێراق ئاشكرایكرد كە تا كۆتایی ئەم هەفتەیە دەستدەكرێتەوە بە هەناردەكردنەوەی نەوتی هەرێم لەڕێگەی بۆری و كۆمپانیای سۆمۆ سەرپەرشتی فرۆشتنی نەوتەكەش دەكات، جەختیش دەكاتەوە بە هەناردەكردنەوەی نەوت پارەی مووچەی مانگی شەشیش ڕەوانە دەكرێت.
شیروان میرزا، ئەندامی لیژنەی دارایی لە خولی پێشووی پەرلەمانی عێرا ق بە SNNی ڕاگەیاند: بەگوێرەی ئەو زانیاری و بەداواداچوونانەی كردوومانە، هەریەكە لە حكومەتی هەرێم و حكومەتی عێراقی هیچ گرفتێكیان نەهێشتووەتەوە بۆ دەستكردنەوە بە هەناردەكردنەوەی نەوت، تەنانەت وەزارەتی نەوتی عێراق كارمەندی پێویستیشی بۆ بەندەری جیهانی توركیا ڕەوانە كردووە، ئەوەی ماوەتەوە چەند گرفتێكی كەمە لە نێوان كۆمپانیاكان و وەزارەتی سامانە سروشتییەكان.
ئاماژەی بەوەشكرد، هەموو ئاماژەكان بەو ئاراستەیەن كە تا كۆتایی ئەم هەفتەیە سەرجەم گرفت و بەربەستەكانی هەناردەكردنەوەی نەوتی هەرێم چارەسەر بكرێن و دووبارە دەستبكرێتەوە بە هەناردەكردنەوەی نەوت بۆ بەندەری جیهان، بەهەناردەكردنەوەی نەوتیش خاڵێكی سەرەكی لێكتێگەیشتنی نێوان هەولێر و بەغدا جێبەجێ دەكرێت كە تایبەت بە ناردنی مووچەی فەرمانبەرانی هەرێم.
ئەو ئەندامەی لیژنەی دارایی لە خولی پێشووی پەرلەمانی عێراق ئەوەشی خستەڕوو، بە هەناردەكردنەوەی نەوتی هەرێم و ناردنی 120 ملیاری داهاتی نانەوتی كە لە ئێستادا لەبەردەستی هەرێمە، هیچ بیانوویەك نامێنێت بۆ نەناردنی مووچەی مانگی شەش، هاوكات هۆكاریش دەبێت بۆ ناردنی مووچەی مانگەكانی داهاتوو.
