ئەمڕۆ لیژنەكانی هەرێم و بەغدا كۆدەبنەوە، پەرلەمانتارێكیش دەڵێت كۆبوونەوە لە پێناو كۆبوونەوە دەكەن

عەلی حەمە سەعید-SNN
وابڕیارە ئەمڕۆ لیژنە هاوبەشەكانی نێوان هەرێم و بەغدا دەستبەكەنەوە بە كۆبوونەوەكانیان بۆ ئامادەكردنی ڕاپۆرتی هاوبەش لەبارەی داهاتی نانەوتی و هەناردەكردنەوەی نەوت، هاوكات پەرلەمانتارێكی كوردیش جەخت لەوەدەكاتەوە تا ئەوكاتەی نەوت هەناردەنەكرێت و 120 ملیارە نەنێردرێت كۆبوونەوەكان بێسود دەبن.

دارا سێكانیانی، ئەندامی لیژنەی یاسایی لە ئەنجومەنی نوێنەرانی عێراق بە SNNی راگەیاند، وا نزیك دەبینەوە لە تێپەڕبوونی هەفتەیەك بەسەر كۆبوونەوەی ئەنجومەنی وەزیرانی عێراق كە تیایدا بڕیاردرا ئەگەر هەرێم 120 ملیارەكە بنێرێت و نەوت هەناردە بكاتەوە، ئەوا پارەی مووچەی مانگی شەش ڕەوانە دەكەن، بەڵالام تا ئەمڕۆ یەك شەممە هیچ هەنگاوێكی كردەیی نەنراوە.

ئاماژەی بەوەشكرد، باس لەوەدەكرێت ئەمڕۆ كۆبوونەوەی لیژنە هاوبەشەكانی نێوان هەرێم و بەغدا دەست بەكۆبوونەوەكانیان دەكەن، بەڵام كۆبوونەوەی ئەم لیژنانە هیچی لێ سەوز نابێت و تەنها كۆبوونەوەن لە پێناو كۆبوونەوە، چونكە هەتا نەوت ڕادەستنەكرێت و 120 ملیارەكە ڕەوانە نەكرێت ئەو كۆبوونەوانەش هیچ سودێكیان نابێت.

ئەوەش لەكاتێكدایە كە شاندێكی هەرێمی كوردستان ڕۆشتوونەتە بەغدا و لە ئەمڕۆوە دەست بەكۆبوونەوەكانیان دەكەن لەگەڵ لایەنی عێراقی بۆ گفتوگۆكردن لەبارەی داهاتی نانەوتی و باج و رسومات و هەروەها هەناردەكردنەوەی نەوت لەڕێگەی كۆمپانیای سۆمۆوە.