بەچاوساغی هێزەكانی پارتی، سەربازانی توركیا ڕێگە نادەن هاوڵاتیانی ئامێدی بچنەوە گوندەكانیان

تایبەت-SNN
ماوەی چەند ڕۆژێكە سەربازانی توركی بە چاوساغی و ڕێنوێنی هێزەكانی پارتی بە قوڵایی دەیان كیلۆمەتر هاتوونەتە چەندین گوندی سنوری ئامێدی و ڕێگە بە گوند نشینان نادەن بگەڕێنەوە سەر موڵك و ماڵەكانیان، هەر هاووڵاتییەك بیەوێت بگەڕێتەوە دەبێت مۆَلەت لە سەربازانی توركیا وەربگرێت.

بەگوێرەی ئەو زانیارییانەی كە هاوڵاتیانی گوندی گوهەرزی سنوری ئامێدی بە SNNیان داوە ئەوە خراوەتەڕوو، ماوەی چەند ڕۆژێكە سەربازانی توركیا بەهەماهەنگی و چاوساغی هێزەكانی پارتی هاتوونەتە گوندەكەمانەوە و ڕێگە نادەن بگەڕێینەوە سەر موڵك و ماڵ و رشەز و باخەكانمان.

ئاماژەی بەوەشكرد، تەنها هاوڵاتیانی گوندەكەی ئێمە نییە سەربازانی توركیا، ڕێگەیان پێنادەن بگەڕێنەوە بەڵكوو هاوڵاتییانی گوندەكانی دیكەی دەوروبەری گوندی گوهەرزی و لە قوڵایی سنوری ئامێدی بەهەمان شێوە ڕێگەیان پێنادرێت بچنە باخەكانی خۆیانەوە و هاوڵاتییانیان ئاگادار كردووەتەوە، كە هیچ كەسێك بەبێ مۆڵەتی ئەوان ناتوانێت سەردانی ئەو ناوچانە بكات.

SNNئەوەشی زانیوە، ئەگەر كەسێك بیەوێت بچێتەوە سەر باخ و ڕەزەكەی دەبێت متمانەپێكراوی هێزەكانی پارتی بێت و ئەوان پشتگیریان بكەن پاشان سەربازانی توركیا ڕێگەیان پێدەدەن بۆ ماوەی چەند كاتژمێرێكی كەم سەردانی باخ و ڕەزەكانیان بكەن و پاشان دەبێت بگەڕێنەوە ئەوەش بەمەرجی ئەوەی نابێت مۆبایل لەگەڵ خۆیاندا ببەن و دەبێت مۆبایلەكانیشیان بپشكێندرێت.