د. نەرمین مەعروف: دەبێت دادگای فیدڕاڵی پرسی داهاتی نانەتی یەکلادەکاتەوە

SNN-

ئەندامێکی پەرلەمانی عێراق رایگەیاند: لە کۆبوونەوەی دوێنێی ئەنجوومەنی وەزیرانی عێراق بڕیاردرا بۆ مانگی شەش بێ هەناردەکردنەوەی نەوت و هیچ مەرجێکی دیکە تەنها بە ناردنی 120 ملیار دیناری داهاتی ناوخۆ مووچە خەرج بکات، بەڵام بۆ مانگەکانی دیکە دەبێت مەسەلەی بابەتی داهاتی نانەوتی رێکبخرێتەوە و بۆ ئەو مەبەستەش بڕیاردراوە کە دادگای فیدڕاڵی بڕیاربدات ئەو پرسە یەکلابکاتەوە

د. نەرمین مەعروف، ئەندامی لیژنەی دارایی پەرلەمانی عێراق بە SNN-ی راگەیاند، کێشەکە لە قانونی ئیدارەی ماڵی ژمارە 6ی ساڵی 2019 لە مادەی 29 باس لەسەدا 50ی داهاتی نانەوتی دەکات کە دەبێت هەرێم لەگەڵ پارێزگاکانی دیکە بیداتە خەزێنەی حکومەتی عێراق.

دەشڵێت: کێشە لەسەر داهاتی لەسەدا 50 نییە، بەڵکو لە سەر ئەوەیە کە ئایا ئەو لەسەدا 50یە چی دەگرێتەوە کە ئایا تەنها داهاتی فەرمانگە فیدڕاڵییەکان، زەریبەیە، گومرکە، ئاو و کارەبایە، بەغدا دەڵێت من هەموویم دەوێت، بەڵام هەرێمی کوردستان دەڵێت تەنها داهاتی گومرک و دەروازە سنورییەکان دەگرێتەوە.

ئەو پەرلەمانتارە دەشڵێت: لەبەر ئەوە ئەم ماددەیە روون نییە کە داهاتە نانەوتییەکان چی دەگرێتەوە، بۆیە دوێنێ لە کۆبوونەوەی ئەنجوومەنی وەزیرانی عێراق بڕیاردراوە کە دەبێت ئەو بابەتە دادگای فیدراڵی تەفسیری بۆ بکات و یەکلایی بکاتەوە بۆئەوەی ئەو کێشانە بە تەواوی چارەسەر ببن.