عێراق نزیكەی یەك تریلیۆن دیناری خستە سەر ژمارە حسابی بانكی هەرێم و سبەی مووچە دابەشدەكرێت

عەلی حەمە سەعید-SNN
كەمێك پێش ئێستا بەڕێوەبەری ژمێریاری سەر بەوەزارەتی دارایی عێراق واژی لەسەر گواستنەوەی بڕی نزیكەی یەك تریلۆن دیناری بۆسەر ژمارە حسابی بانكی هەرێم كرد، بەرپرسێكی وەزارەتی دارایش ئاشكرایكرد سبەی دوو شەممە دەستبەدابەشكردنی مووچە دەكرێت.

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوەخراوەتەڕوو، دوای ئەوەی ڕۆژی پێنج شەممە وەزیری دارایی عێراق واژۆی لەسەر ناردنی مووچەی مانگی شەش كرد، ئەمڕۆش لەلایەن بەڕێوەبەری ژمێریاری وەزارەتی دارایی عێراق واژۆ كرا لەسەر گواستنەوەی 990 ملیار دینار بۆسەر ژمارە حسابی بانكی هەرێم.

ئاماژەی بەوەشكرد، كەمێك پێش ئێستا گوژمەی یەكەمی ئەو پارەیە كە نزیكەی 700 ملیار دینارە خرایە سەر ژمارە حسابی بانكی هەرێم و هەر ئەمڕۆش تەواوی پارەكە دەگوازرێتەوە سەر ژمارە حسابی بانكی هەرێم بۆ مانگی شەش و سبەی دوو شەممەش دەستبەدابەشكردنی مووچەدەكرێت.

ئەو بەرپرسەی وەزارەتی دارایی ئەوەشی خستەڕوو،بەراورد بە مانگی پێنج زیاد لە 50 ملیار دینار زیاتر خراوەتە سەر ژمارە حسابی بانكی هەرێم، ئەوەش بەهۆی ئەوەی لەم مانگەدا ژمارەیەكی زیاتر لە خانەنشینان شەش مووچە پێكەوە وەردەگرن كە لەسەرەتای ئەمساڵەوە خانە نشین بوون