ترەمپ چەند وڵاتێکی خستە لیستی رەشەوە
دۆناڵد ترەمپ
SNN
دۆناڵد تره‌مپ، سه‌رۆكی ئه‌مریكا رۆژی هه‌ینی فه‌رمانێكی واژووكرد و لیستی ره‌شی بۆ ئه‌و وڵاتانه دروستكرد كه به‌گوێره‌ی واشنتۆن، به ناڕه‌وا ئه‌مریكییه‌كان ده‌ستبه‌سه‌رده‌كه‌ن.
میدیاکانی ئەمریکا رایدەگەیەنن، ئەو لیستەی ترەمپ دروستیکردووە له لیستی وڵاتانی پشتیوانی تیرۆره‌وه وه‌رگیراوه كه وه‌زاره‌تی ده‌ره‌وه‌ی ئه‌مریكا ئاماده‌ی ده‌كات و سزای دارایی به‌سه‌ر ئه‌و وڵاتانه‌دا ده‌سه‌پێنێت كه ناویانی تێدایه.
هاوکات، ئیداره‌ی تره‌مپ تا ئێستا به فه‌رمی ناوی ئه‌و وڵاتانه‌ی ئاشكرا نه‌كردووه كه ره‌نگه بخرێنه لیستی ره‌شه‌وه، به‌ڵام به‌رپرسێكی باڵا ئاماژه‌ی به‌وه كردووه كه پێده‌چێت چین، ئێران و ئه‌فغانستان له‌نێو ئه‌و وڵاتانه‌دا بن به‌هۆی “تێوه‌گلانی دووباره‌یان له دیپلۆماسیه‌تی بارمته”.
ئەو بەرپرسە به رۆژنامه‌نووسانی وتووه، “ئه‌مڕۆ سنوورێكی دیار و هێڵی سوور داده‌نێین، ناتوانن ئه‌مریكییه‌كان وه‌كو موزایه‌ده به‌كاربهێنن، ئه‌گه‌رنا رووبه‌ڕووی لێكه‌وته‌ی توند ده‌بنه‌وه”.
به‌پێی ئه‌و فه‌رمانه نوێیه، ئه‌و وڵاتانه‌ی واشنتۆن ده‌یانكاته ئامانج، سزایان به‌سه‌ردا ده‌سه‌پێندرێت، هه‌روه‌ك ئه‌و به‌رپرسانه‌شیان كه ده‌ستیان له ده‌ستبه‌سه‌ركردنه‌كاندا هه‌یه، رێگایان پێنادرێت بچنه ناو ئه‌مریكاوه.
