كەشناسیی عێراق: ئەمساڵ ڕووبەڕووی شەپۆلی بارانبارینی بەخوڕ و لەناکاو دەبینەوە

SNN

دەستەی کەشناسیی عێراق پێشبینی دەکات، کە وەرزی دابارینی ئەمساڵدا شەپۆلی بارانبارینی بەخوڕ روو لە عێراق بە تایبەتی ناوچەکانی باکوور (هەرێمی کوردستان) و رۆژهەڵاتی وڵاتەکە بکات.

عامر جابری، بەڕێوەبەری ڕاگەیاندن لە دەستەی كەشناسی عێراق ڕایگەیاند، پێشبینی گشتی بۆ وەرزی دابارینی 2025-2026 مەیلی بەرەو ناجێگیری ENSO هەیە، لەگەڵ ئەگەری دروستبوونی شەپۆلێک لە زەریای هێمن لە ماوەی پایز و سەرەتای زستاندا، ئەوەش ئاماژەیە بۆ شێوازی بارانبارینی نائاسایی و ناوچەیی.

باسی لەوەشکرد، بارانی بەخوڕ زیاتر ناوچەکانی باكوور و ڕۆژهەڵاتی عێراق دەگرێتەوە، لە كاتێكدا ناوچەكانی ناوەند و باشوور زۆرجار لە دەوروبەری بارانبارینی مامناوەند دەمێننەوە.
جەختیشی کردەوە، کە ئەگەری هەیە وڵاتەکە رووبەڕووی شەپۆلی بارانبارینی لەناكاو بێتەوە، ئەو جۆرە ڕووداوانە وەك ڕووداوی كورتخایەن ڕودەدەن و دوو بۆ سێ ڕۆژ پێش شەپۆلی بارانبارین و لافاو، لایەنە پەیوەندیدارەكان ئاگادار دەكەنەوە