پەرلەمانی عێراق کۆدەبێتەوە و خوێندنەوە بۆ 11 پڕۆژەیاسا دەکات
SNN-
ئەمڕۆ دووشەممە پەرلەمانی عێراق کۆدەبێتەوە دەنگ لەسەر 11 پرۆژە یاسا دەدات کە کە گرنگترینیان وزەی نوێبووەوە، دەسەڵاتی رێکخستنی ئەتۆمی و سێیەمین هەمواری یاسای قەرەبووکردنەوەی ئەو کەسانەیە، کە لە سەردەمی دەسەڵاتی بەعسدا بەشێکی جەستەیان لەدەستداوە.
بە گوێرەی بەرنامەی کاری دانیشتنەکە کە لەلایەن راگەیاندنی ئەنجوومەنی نوێنەرانی عێراقەوە بڵاوکراوەتەوە، خوێندنەوەی دووەم بۆ پرۆژەیاسای دەستەی گشتیی چاودێریکردنی تەرخانکردنی داهاتە فیدراڵییەکان دەکرێت، ئەمە جگە لەوەی خوێندنەوەی دووەم بۆ رەشنووسی یاسای کۆلێجی فڕۆکەوانی سوپاش دەکرێت.
لە کۆبوونەوەکەدا یاسای رێکخستنی کاری سەندیکاکان، دوای ئەنجامدانی خوێندنەوەی دووەم، ئامادەیە بۆ پەسەندکردن لە ئەنجوومەنەکەوە، کە ئەم یاسایە سەربەخۆیی بۆ کاری سەندیکاکان دەگەڕێنێتەوە.
هەروەها لە دانیشتنەکەدا دەنگ لەسەر رەشنووسی هەمواری چوارەمی پرۆژەیاسای وەبەرهێنانی پیشەسازیی کەرتی تایبەت دەدرێت، جگە لەوەش دەنگ لەسەر هەمواری یەکەمی پرۆژەیاسای بەرگریی شارستانی و هەمواری سێیەمی پرۆژەیاسای خزمەتگوزاری زانکۆکان دەدرێت.
