ترەمپ بۆ ئیسرائیل: قەتەر هاوپەیمانێکی گەورەی ئێمەیە

سەرۆکی ئەمریکا رایگەیاند، قەتەر هاوپەیمانێکی گەورەی واشنتنە، ئیسرائیل و وڵاتانی دیکە دەبێت وریابن کاتێک هێرش دەکەنە سەر خەڵک.

دۆناڵد ترەمپ، سەرۆکی ئەمریکا لە لێدوانێکی رۆژنامەوانیدا رایگەیاند، هێرشەکە خزمەت بە بەرژەوەندییەکانی هیچ کام لە لایەنەکان ناکات. ئەم لێدوانە دوای هێرشەکەی ئیسرائیل بۆ سەر قەتەڕ و کردنە ئامانجی سەرکردەکانی حەماس دێت.

ئامانجی هێرشەکەی ئیسرائیل سەرکردە باڵاکانی حەماس بوون، بەڵام بە وتەی بەرپرسانی بزووتنەوەکە هیچ سەرکردەیەکیان نەکوژراوە. تەنیا پێنج ئەندامی بزووتنەوەکە و ئەندامێکی هێزە ئەمنییەکانی قەتەر کوژراون.

هێرشەکەی سەر قەتەر، کە رۆژی سێشەممەی رابردوو ئەنجامدرا سەرکۆنەیەکی بەرفراوانی نێودەوڵەتی بەدوای خۆیدا هێنا بەتایبەتی لەلایەن وڵاتانی کەنداوەوە.