کەجەکە “ئاکۆ عەباس ئاغا هەمیشە پشتیوانی گەریلا بووە”
SNN
کەجەکە ڕایدەگەیەنێت کە سەرۆک عەشیرەتی ئاکۆیی کە دوێنێ کۆچی دوایی کرد، بەردەوام پشتیوانی لە گەریلاکانیان کردووە.
هاوسەرۆکایەتی کۆنسەی بەڕێوەبەری کۆما جڤاکێن کوردستان “کەجەکە”، سەبارەت بە کۆچی دوایی ئاکۆ عەباس ئاغا، کەسایەتی دیاری کوردستان کە دوێنی کۆچی دوایی کرد ڕاگەیەندراوێکی بڵاوکردەوە و تێیدا هاتووە: “بە داخ و پەژارەیەکی زۆرەوە، هەواڵی کۆچی دوایی کەسایەتی نیشتمانپەروەری باشووری کوردستان، کاک ئاکۆ عەباس ئاغا، سەرۆکی عەشیرەتی ئاکۆمان پێگەیشت. کاک ئاکۆ عەباس ئاغا کەسایەتییەکی گرنگ و ناوداری کۆمەڵایەتی و نەتەوەیی گەلەکەمان بوو کە لە لای هەمووان بەتایبەت لە دەڤەری ڕاپەڕین و پشدەر و بتوێن خۆشەویست و خاوەن پێگەی بەهێز بوو”.
کەجەکە لە ڕاگەیەندراوەکەیدا دەڵێت: ” کاک ئاکۆ عەباس ئاغا، کەسایەتییەکی خاوەن هەست و هەڵوێستی بەرزی نیشتمانپەروەری و ئازادیخوازی بوو و لە قۆناخە گرنگەکاندا خەمخۆر و پشتیوان و دڵسۆزی تێکۆشانی ئازادیخوازی گەلەکەمان بووە لە هەر چوار بەشی کوردستان”.
ئەوەش دەخاتەڕوو کە “کاک ئاکۆ عەباس ئاغا، دۆستێکی هێژای بزووتنەوەی ئازادیخوازی کوردستان بوو، وە وێڕای هەموو مەترسی و گوشارەکان بەردەوام بووە لە پشتیوانی کردنی گەریلای ئازادی کوردستان”.
کەجەکە ڕاشیگەیاند، “بەم بۆنە خەمناکەوە لە سەر ناوی هەموو گەریلای ئازادی کوردستان پرسە و سەرەخۆشی خۆمان ئاراستەی گەلی باشووری کوردستان و بەتایبەت بنەماڵەی هێژای کاک ئاکۆ عەباس ئاغا و گەلەکەمان لە دەڤەری راپەڕین دەکەین، خۆمان بە هاوبەشی خەم و پەژارەتان دەزانین، لە پەروەردگاری مەزن داواکارین کە ڕۆحی کاک ئاکۆ عەباس ئاغا بە بەهەشتی بەرین شاد بکات و سەبووری و ئارامی و دڵنەوایی بە ئێوەی بەڕێز ببەخشێت”.
