وتەبێژی كۆمیسیۆن: زیاتر لە 23 ملیۆن كاغەزی دەنگدانمان چاپكردووە كە ساختە ناکرێن

عەلی حەمە سەعید-SNN
وتەبێژی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات، زیاتر لە 23 ملیۆن كاخەزی تایبەت بە دەنگدانمان لە وڵاتی ئیمارات چاپكردووە، كە كوالیتی هێندە بەرزە ناتواندرێت ساختە بكرێن.

جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: لە چوارچێوەی ئامادەكارییەكان بۆ بەڕێوەچوونی پرۆسەی هەڵبژاردنی پەرلەمانی عێراق، قۆناغێكی نوێمان دەستپێكردووە كە ئەویش بە چاپگەیاندنی كاغەزی دەنگدانە، بۆ ئەومەبەستەش تا 22 ملیۆن و 46 هەزار كاغەز بۆ دەنگدانی گشتی و هەروەها بۆ دەنگدانی تایبەتیش یەك ملیۆن و 509 هەزار كاغەزمان بە چاپ گەیاندووە.

ئاماژەی بەوەشكرد، كاغەزەكانمان لە وڵاتی ئیمارات بە بەرزترین كوالیتی چاپكردووە كە ساختەكردنیان زۆر ئەستەمە و نیشانەی ئەمنیی شاراوەیان لەسەردانراوە كە تەنها بە ئامێر و پشكنینی تایبەت ئاشكرا دەكرێن و ناتواندرێت لەبەرگرتنەوەیان بۆ بكرێت.

وتەبێژەكەی كۆمیسیۆن ئەوەشی خستەڕوو، پێش وادەی هەڵبژاردن، پرۆسەی چاپكردنی كاخەزەكان تەواو دەكرێت و سەرجەمیان دەگەیەندرێن ناوەندەكانی دەنگدان لەپارێزگاكانی عێراق و هەرێمی كوردستان.