پێشەوا هەورامانی لە بارەی مووچەوە هەواڵە خۆشەکەی راگەیاند
پێشەوا هەورامانی، وتەبێژی حکومەتی هەرێم
SNN
وتەبێژی حکومەتی هەرێم رایگەیاند، ئەمڕۆ رێککەوتنی سێقۆڵی لە نێوان شاندی حکومەتی هەرێم و کۆمپانیا نەوتییەکان و شاندی حکومەتی عێراق دەکرێت، دەڵێت “سبەینێ بڕیار لەبارەی مووچەوە دەدرێت”.
پێشەوا هەورامانی، وتەبێژی حكومەتی هەرێمی كوردستان رایگەیاند، ئەمڕۆ دووشەممە 22ی ئەیلوول، ڕێككەوتنی سێقۆڵی بۆ هەناردەكردنەوەی نەوتی هەرێمی كوردستان واژوو دەكرێت، سبەی سێشەممە ئەنجوومەنی وەزیرانی عێراق بڕیار لەسەر پرسی مووچە دەدات.
ئاماژەی بەوەکردووە، حكومەتی هەرێمی كوردستان، حكومەتی فیدراڵ و كۆمپانیاكانی بەرهەمهێنانی نەوت لەسەر پرسی نەوت گەیشتوونەتە ڕێككەوتن، ئەمڕۆش گرێبەستی سێقۆڵی نێوانیان واژوو دەكرێت.
جەختیکردووەتەوە، بە واژووكردنی ئەو ڕێككەوتنە، هیچ بەربەستێك لە بەردەم ناردنی مووچە نامێنێت و پێویستە حكوومەتی فیدراڵی بەو ئەركەی خۆی هەڵسێت و مووچەی فەرمانبەرانی هەرێمی كوردستان بنێرێت.
هاوکات، بەگوێرەی زانیارییەکان کە دەست میدیاکان کەوتووە، ئەمڕۆ كۆبوونەوەی نێوان وەزارەتی سامانە سروشتییەكانی حكومەتی هەرێمی كوردستان، وەزارەتی نەوتی عێراق و كۆمپانیاكانی وەبەرهێنانی نەوت لەبارەی ڕێككەوتنی نێوانیان دەكرێت، سبەینێ سێشەممە هەناردەکردنی نەوتی هەرێم دەستپێدەکاتەوە.
