وەزیری دەرەوەی دانیمارک: لەسەر پلانێک کاردەکەین بۆ داننان بە دەوڵەتی فەلەستیندا

SNN

لارس لوکە راسموسن، وەزیری دەرەوەی دانیمارک رایگەیاندووە، وڵاتەکەی کاردەکات بۆ پلانێک تاکو بە فەرمی دان بە دەوڵەتی فەلەستیندا بنێت.

وەزیری دەرەوەی دانیمارک لە بڵاوکراوەیەکیدا لە تۆڕی کۆمەڵایەتی ئینستاگرام، هەڵوێستی وڵاتەکەی لەبارەی داننان بە دەوڵەتی فەلەستیندا بڵاوکردووەتەوە و دەڵێت ” لە کۆبوونەوەکەی کۆمەڵەی گشتی نەتەوەیەکگرتووەکان کە ئەمڕۆ لە نیویۆرک بەڕێوەدەچێت هەڵووێستی دانیمراک رادەگەیەنین”.

هاوکات، مانگی ڕابردوو مێت فرێدریکسن، سەرۆکوەزیرانی دانیمارک، دانپێدانانی دەوڵەتی فەلەستینی بەدوور نەزانی کە بە مەرجێک دەوڵەتێکی دیموکراسی بێت.

ئاماژەی بەوەکردبوو، “ئێمە ناڵێین نەخێر بۆ دانپێدانانی فەلەستین وەک دەوڵەت، ئێمە پشتگیری لێدەکەین… بەڵام بێگومان دەبێت دڵنیابین لەوەی کە دەوڵەتێکی دیموکراسی دەبێت”.

ئەمەش دوای ئەوە دێت، دوێنێ دووشەممە هەریەکە لە کەنەدا و بەریتانیا و ئوستراڵیا و پورتوگال بە فەرمی دانیان بە دەوڵەتەی فەلەستیندا نا، لە کاردانەوەشدا بن گوێری وەزیری ئاسایشی ناوخۆی ئیسرائیل، لە پەیامێکدا کە لە تۆڕی کۆمەڵایەتی ئێکس ڕایگەیاند، دانپێدانانی دەوڵەتی فەلەستین لەلایەن بەریتانیا، کەنەدا و ئوسترالیا پاداشتی حەماس دەداتەوە و پێویستە دەستبەجێ بەرپەرچی ئەو هەوڵانە بدرێتەوە و  فەلەستین نەک نابێت بە دەوڵەت بناسرێت، بەڵکو پێویستە پارچە پارچەش بکرێت و بۆ ئەو کارەش هەموو هەوڵێک دەدەین.