لە كۆبوونەوەكەی سبەی ئەنجومەنی وەزیران بڕیار لەسەر ناردنی مووچە دەدرێت؟
نەرمین مەعروف
عەلی حەمە سەعید-SNN
ئەندامێكی لیژنەی دارایی لە ئەنجومەنی نوێنەرانی عێراق ئاشكرایدەكات لە كۆبوونەوەكەی سبەی ئەنجومەنی وەزیران بە مەرجێك باسی مووچە و ناردنی پارە دەكرێت ئەگەر ئەمڕۆ ڕێككەوتنی سێ قۆڵی بۆ هەناردەكردنەوەی نەوت واژۆبكرێت و هەروەها ڕاپۆرتی ئەنجومەنی دەوڵەتیش ڕەوانەی ئەنجومەنی وەزیران بكرێت.
د. نەرمین مەعروف، ئەندامی لیژنەی دارایی لە پەرلەمانی عێرا قبە SNNی ڕاگەیاند: وابڕیارە سبەی سێشەممە كۆبوونەوەی ئەنجومەنی وەزیرانی عێراق بەڕێوەبچێت، بە دوو مەرجی سەرەكیش باس لە مووچەی فەرمانبەرانی هەرێم دەكرێت هەروەها و بڕیاری ناردنی پارە دەدرێت.
ئاماژەی بەوەشكرد، ئەگەر ئەمڕۆ ڕێككەوتنی سێ قۆڵی بۆ هەناردەكردنەوەی نەوت لەنێوان كۆمپانیاكان و وەزارەتی سامانە سروشتییەكان و وەزارەتی نەوتی عێراق واژۆبكرێت، ئەوا هەنگاوێكی گرنگ دەبێت بۆ چارەسەركردنی گرفتی ناردنی مووچە.
ئەو ئەندامەی لیژنەی دارایی ئەوەشی خستەڕوو، مەرجێكی دیكەی تاوتوێكردنی بابەتی مووچەی فەرمانبەرانی هەرێم لە دانیشتنەكەی سبەی ئەنجومەنی وەزیرانی عێراق پەیوەستە بەناردنی ڕاپۆرتی ئەنجومەنی دەوڵەت كە لە 17 لاپەڕە پێكدێت، بۆیە ئەگەر لە كارنامەی دانیشتنی ئەنجومەنی وەزیران ئەو دوو بابەتەی تێدا بوو ئەوا ناردنی مووچە و پارە بۆ هەرێم یەكێك دەبێت لە تەوەرەكانی دانیشتنەكەی سبەی سێشەممە.
