وتەبێژی كۆمیسیۆن بۆ SNN: تادوای هەڵبژاردن پێدانی ڕێز و سوپاس ودابەشكردنی زەوی قەدەغەیە

عەلی حەمە سەعید-SNN

وتەبێژی كۆمیسیۆنی بالای سەربەخۆی هەڵبژاردنەكانی عێراق ئاماژە بەوەدەكات بە بڕیاری ئەنجوومەنی كۆمیسیاران تا دوای هەڵبژاردنەكانی پەرلەمان پیدانی ڕێز و سوپاس دابەشكردنی زەوی نیشتەجێبوون و دەركردنی فەرمانی دامەزران، قەدەغەكران.

جومانە غەلای، وتەبێژی كۆمسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: لە دواین كۆبوونەوەی ئەنجومەنی كۆمیسیارانی سەر بە كۆمیسیۆن، ژمارەیەك بڕیاری دەركراون كە  بڕیارەكان مەبەستیان رێگریكردنە لە بەكارهێنانی موڵك و ماڵی دەوڵەت و قۆستنەوەیان بۆ بانگەشەی هەڵبژاردن.

ئاماژەی بەوەشكرد، بەگوێرەی بڕیارەكانی ئەنجوومەنی كۆمیسیاران تا دوای كۆتایی هاتنی پرۆسەی دەنگدان و هەڵبژاردنی پەرلەمانی عێراق بابەتی دابەشكردنی زەوی نیشتەجێكردن و هەروەها پێدانی ڕێزو سوپاس بە فەرمانبەران و هاوكات بڕیاری دامەزراندنی فەرمانبەران بەهەموو جۆرەكانییەوە قەدەغەیە.

وتەبێژەكەی كۆمیسۆنی بالای سەربەخۆی هەڵبژاردنەكان ئەوەشی خستەڕوو، دەركردنی ئەم بڕیارانە بۆیەوەیە كە ئەو بابەتانە لەلایەن حزب و كاندیدەكانەوە وەك بانگەشەی هەڵبژاردن و هەروەها بەڵێنی هەڵبژاردن بەكار نەهێندرێن هاوكات دەبێت هەموو لایەنە پەیوەندیدارەكانیش پەیوەست ببن بە جێبەجێكردنی ئەو بڕیارانەوە.