وەزارەتی سامانە سروشتییەکان: چاوەڕێی وەڵامی بەغدادین

SNN

وەزارەتی سامانە سروشتییەکانی حکومەتی هەرێمی کوردستان لە ڕاگەیەندراوێکدا ئاشکرایکرد، تەواوی پابەندییەکانی خۆی بۆ هەناردەکردنەوەی نەوتی هەرێمی کوردستان لەگەڵ وەزارەتی نەوتی فیدراڵ جێبەجێ کردووە و ئێستا چاوەڕوانی وەڵامی بەغدادن بۆ دەستپێکردنەوەی پرۆسەکە.

جێبەجێکردنی بڕیارەکانی ئەنجومەنی وەزیران

وەزارەتی سامانە سروشتییەکان جەختی لەوە کردەوە کە لە چوارچێوەی ڕاسپاردە و بڕیارەکانی ئەنجومەنی وەزیران، سەرجەم ئەرکەکانی خۆی بەجێهێناوە بۆ ئاسانکاری لە هەناردەکردنەوەی نەوتی هەرێم.

واژووکردنی ڕێککەوتن لەگەڵ کۆمپانیاکان

بەپێی ڕاگەیەندراوەکە، وەزارەت ڕێککەوتنی لەگەڵ سەرجەم کۆمپانیا ناوخۆیی و بیانییەکانی بەرهەمهێنەری نەوت واژوو کردووە، تەنها یەک کۆمپانیای بیانی تا ئێستا ڕێککەوتنەکەی واژۆ نەکردووە، بەڵام وەزارەت ڕوونیکردەوە کە ئەمە کاریگەرییەکی لەسەر ڕێککەوتنە سێ قۆڵییەکە نابێت کە لەنێوان وەزارەتی سامانە سروشتییەکان، کۆمپانیاکان و وەزارەتی نەوتی فیدراڵدا هەیە.

ناردنی ڕەزامەندی فەرمی بۆ بەغداد

وەزارەتی سامانە سروشتییەکان ئاماژەی بەوەشکردووە کە لە ڕێکەوتی (23)ی ئەم مانگەدا، وەڵامی ڕەزامەندییەکانی خۆی و کۆمپانیاکانی بە نووسراوێکی فەرمی ئاراستەی وەزارەتی نەوتی فیدراڵ کردووە.

چاوەڕوانی بۆ دەستپێکردنەوەی هەناردەکردن

لە کۆتاییدا، وەزارەتی سامانە سروشتییەکان ڕایگەیاند کە چاوەڕوانن وەزارەتی نەوتی فیدراڵ وەڵامیان بداتەوە و ڕێککەوتنەکە واژۆ بکات، تاوەکو کۆمپانیای بەبازاڕکردنی نەوتی عێراق (سۆمۆ) بە زووترین کات دەست بە هەناردەکردنی نەوتی هەرێم بکاتەوە و بڕگەکانی ڕێککەوتنەکە جێبەجێ بکات.