بافڵ جەلال تاڵەبانی، سهرۆكى یهكێتیی نیشتمانیی كوردستان | فۆتۆ: SNN
SNN-
بافڵ جەلال تاڵەبانی، سەرۆکی یەکێتیی نیشتمانیی کوردستان، لە پەیامێکدا بە گەرمی پێشوازی لە رێککەوتنی نێوان حکومەتی هەرێمی کوردستان و حکومەتی فیدراڵی عێراق دەکات و پیرۆزبایی لە خەڵکی کوردستان دەکات. هاوکات جەخت لەوە دەکاتەوە کە ئەم دەسکەوتە بەرهەمی پشوودرێژی و خۆڕاگریی ئەوانە.
دیالۆگ؛ تاکە رێگای راستەقینەی چارەسەر
سەرۆکی یەکێتیی نیشتمانیی کوردستان دووپاتی دەکاتەوە کە هەمیشە باوەڕی تەواویان بە گفتوگۆ و دیالۆگ هەبووە وەک باشترین میکانیزم بۆ یەکلاکردنەوەی کێشەکان. لە پەیامەکەیدا هاتووە: “هەمیشە باوەڕمان وابووە و داکۆکیش لەسەر ئەوە دەکەین کە دیالۆگ و گفتوگۆ باشترین چارەسەرە بۆ گەیشتن بە ئەنجامی دڵخواز لە بەرژەوەندی هاوڵاتییانمان.”
چاوەڕوانییەکان لە رێککەوتنەکە؛ دادپەروەری و شایستە داراییەکان
بافڵ جەلال تاڵەبانی هیواخوازە کە ئەم رێککەوتنە ببێتە دەروازەیەک بۆ خزمەتکردنی زیاتری خەڵکی کوردستان و کۆتایی بە نادادپەروەری بهێنێت لە دابەشکردنی داهاتی گشتیی وڵاتدا. تاڵەبانی داوا دەکات کە چیتر ماف و شایستە داراییەکانی هەرێمی کوردستان پشتگوێ نەخرێن و بە تەواوی و بەپێی ئەوەی لە دەستووردا جێگیر کراوە رادەست بکرێن.
بەغدا؛ قوڵایی ستراتیجی بۆ خزمەتی هەرێم
سەرۆکی یەکێتی روونیکردەوە کە چارەسەرکردنی بنەڕەتیی کێشەکان لە بەغداوە و ئەوان بە بایەخەوە لەم پەیوەندییە ستراتیژییە دەڕوانن. وتی: “ئێمە قوڵایی ستراتیجی چارەسەرکردنی کێشەکان لە بەغدا دەبینین و لەو رێگایەوە دەتوانین خزمەتی خەڵک و هەرێمەکەمان بکەین.”
لە کۆتایی پەیامەکەیدا، بافڵ جەلال تاڵەبانی سوپاس و دەستخۆشی خۆی ئاراستەی هەموو ئەو کەس و لایەنانە کرد کە بە هەر شێوەیەک بووبێت، هاوکار و پشتیوان بوون بۆ گەیشتن بەم رێککەوتنە و سەرخستنی پرۆسەکە.
