بەشیک لەکۆبوونەوەی ئەنجومەنی وەزیران
SNN-
بڕیارە ئەمڕۆ چوارشەممە، ئەنجوومەنی وەزیرانی هەرێمی کوردستان کۆببێتەوە و تێیدا سێ تەوەری سەرەکی تاوتوێ بکات، کە گرنگترینیان بارودۆخی دارایی هەرێم و پرسی داهاتە نانەوتییەکانە.
تاوتوێی دۆخی دارایی و داهاتی نانەوتی دەکرێت
بەگوێرەی کارنامەی کۆبوونەوەکە، لە بڕگەی یەکەمدا بارودۆخی نوێی دارایی هەرێمی کوردستان لە دوای رێککەوتنی هەناردەکردنی نەوت، پۆلێنکردنی داهاتە نانەوتییەکان و دیاریکردنی بەشی گەنجینەی فیدراڵی لەو داهاتانە گفتوگۆی لەسەر دەکرێت.
رێبەری سەلامەتی و هەڵوەشاندنەوەی چەند بڕیارێک
لە بڕگەکانی دووەم و سێیەمی کۆبوونەوەکەدا، گفتوگۆ لەبارەی رێبەری سەلامەتی کە لەلایەن وەزارەتی ناوخۆوە ئامادەکراوە، لەگەڵ هەڵوەشاندنەوەی چەند بڕیارێکی پێشووتری ئەنجوومەنی وەزیران دەکرێت.
پابەندبوون بە رێککەوتنی داهاتی نانەوتی
ئەم کۆبوونەوەیە لە کاتێکدایە کە بەگوێرەی لێکتێگەیشتنی نێوان هەولێر و بەغداد، تاوەکو یەکلاییبوونەوەی پرسی داهاتی نانەوتی، هەرێمی کوردستان مانگانە 120 ملیار دینار بە کاش رادەستی بەغداد دەکات. حکومەتی هەرێمی کوردستانیش بۆ مانگەکانی ئایار، حوزەیران و تەمموز، کۆی گشتی 360 ملیار دیناری وەک داهاتی نانەوتیی ئەو سێ مانگە رەوانەی بەغداد کردووە.
