SNN-
پنتاگۆن بە فەرمی دەستپێکردنی پرۆسەی کەمکردنەوەی بوونی سەربازیی ئەمریکای لە عێراق راگەیاند و ئەم هەنگاوەشی بە رەنگدانەوەی سەرکەوتنی هاوبەش لە شەڕی دژی داعشدا ناوبرد.
هەنگاوێک بەرەو هاوبەشیی ئەمنی
شۆن پارنێل، وتەبێژی وەزارەتی بەرگریی ئەمریکا رایگەیاند، لەژێر راسپاردەی دۆناڵد ترەمپ و بە هەماهەنگی لەگەڵ لیژنەی هاوبەشی سەربازی، ئەمریکا و هاوپەیمانان پرۆسەی کەمکردنەوەی سەربازی لە عێراق دەستپێدەکەن, راشیگەیاند، ئەمە هەنگاوێکە بەرەو گواستنەوە بۆ هاوبەشییەکی ئەمنی بەردەوام کە لەگەڵ بەرژەوەندییە نیشتمانییەکانی ئەمریکا و دەستووری عێراقدا هاوتەریب بێت.
وردەکاریی کشانەوەکە ئاشکرا نەکراوە
پنتاگۆن لە راگەیەندراوەکەیدا ئاشکرای نەکردووە کە پرۆسەکە چۆن دەبێت، چەند سەرباز دەکشێنەوە و چەند یەکە لە عێراقدا دەمێننەوە، بەڵام جەختی کردووەتەوە کە بەردەوام دەبن لە هەماهەنگی لەگەڵ حکومەتی عێراق و هاوپەیمانان بۆ دڵنیابوون لە ئاڵوگۆڕێکی بەرپرسیارانە و رێکوپێک.
ژمارەی سەربازانی ئەمریکا لە عێراق و سووریا
ئەمریکا لە ساڵی 2014وە سەرکردایەتیی هاوپەیمانیی نێودەوڵەتی دژی داعش دەکات. تاوەکو سەرەتای 2025 ژمارەی سەربازانی لە عێراق نزیکەی 2,500 سەرباز بووە و پێشبینی دەکرێت لە داهاتوودا بۆ کەمتر لە 2,000 سەرباز کەمبکرێتەوە. ژمارەی سەربازانی ئەمریکا لە سووریاش کەمترە لە هەزار سەرباز.
