هاوکاریی دارایی هاوپەیمانان بۆ مانگی 9 دابەش دەکرێت

SNN-

وەزارەتی پێشمەرگەی حکومەتی هەرێمی کوردستان رایگەیاند، هاوکاریی دارایی هاوپەیمانان بۆ مانگی ئەیلول (مانگی 9) گەیشتووەتە وەزارەت و لە رۆژی دووشەممەوە دەست بە دابەشکردنی دەکرێت، ئەمجارە زۆرینەی هەرە زۆری پێشمەرگە لە رێگەی پرۆژەی “هەژماری من”ـەوە هاوکارییەکە وەردەگرن.

تەمویلکردن و رێکارە ژمێریارییەکان

بەپێی راگەیەندراوێکی وەزارەتی پێشمەرگە، ئەمڕۆ یەکشەممە 5ی ئۆکتۆبەری 2025، هاوکاریی دارایی هاوپەیمانان بۆ مانگی 9 تەمویلی وەزارەتی پێشمەرگە کراوە. لەلایەن بەڕێوەبەرایەتیی گشتیی بوودجە و بەرنامەکان (ژمێریاریی سەربازی) دەست بە ئەنجامدانی رێکارە دارایی و ژمێریارییەکان کراوە بۆ تەواوکردنی ئامادەکارییەکان.

وادە و میکانیزمی دابەشکردن

بۆ مەبەستی دابەشکردنی هاوکارییەکە، بڕیارە رۆژی دووشەممە، رێکەوتی 6ی ئۆکتۆبەر، دەست بە دابەشکردنی بکرێت. لەم مانگەدا گۆڕانکارییەکی بەرچاو لە میکانیزمی دابەشکردنەکەدا هەیە، بەجۆرێک نزیکەی 97%ی ئەفسەران، پلەداران و پێشمەرگە لە رێگەی سیستمی پرۆژەی “هەژماری من”ـەوە هاوکارییەکەیان پێدەگات. ئەو رێژەیەی کە ماوەتەوە و تا ئێستا نەچوونەتە نێو سیستمەکەوە، لە رێگەی سیستمی بانکییەوە هاوکارییەکانیان پێدەدرێت.